Diabierna awor na Green Square Minister Michelle Hooyboer den pleno preparacion pa Feria di Speransa

“Nos ta cla y preparacionnan ta andando pa drecha tentnan, decora e lugar y pa nos por yama pueblo bon bini diabierna awor”, asina Michelle Hooyboer-Winklaar, Minister di Enseñansa y Famia a duna di conoce diadomingo atardi na ocasion di e trabounan di preparacion andando na Green Square.

Un rato cu e mandatarionan a presenta, mesora e lugar a yega di siguidor, sostenedor y votadornan cu a bin duna un man pa decora, pa plak sticker y asina anticipa e evento dedica n’e temporada aki di fin di aña.

 

Normalmente ta tene un concierto di speransa dilanti Cas di Partido, pero e aña aki e partido mas grandi y cu mas asiento den Parlamento a dicidi di muda pa Green Square y a cambia e concepto den un feria.

“Mi ta invita henter pueblo di Aruba pa bishita nos diabierna awor, pa hunto nos celebra e dianan aki di union, di paz y di speransa”, asina e mandatario a enfatisa.

 

E evento ta tuma lugar diabierna awor dia 16 di december cuminsando for di 7:00pm riba Green Square n’e cruzada di Adriaan Lacle Boulevard y L.G. Smith Boulevard.

Entretenimento lo ta den man di Robert Maduro y su Alma Folklorico, Janiro “Ataniro” Eisden, Modechi y su grupo, Melodia y cu presentacion special di e banda di momento, “Buleria” cu lo compaña e cantante Izaline Calister.  Tur esaki compaña pa un cantidad di DJ pa entretene henter e anochi.

 

Top