Diadomingo 29 di januari lo tene Competencia di landamento celebrando Dia di Betico

Diadomingo 29 di januari proximo, Arubaanse Zwembond lo tene su prome grandioso competencia di landamento pa loke t’e calendario di actividad den e aña 2017 esaki pa tur club di natacion competitivo den Pisina Olimpico Roly Bisslik na Savaneta.

Riba e dia aki lo tin e oportunidad tambe pa landa time trials pa purba clasifica p’e diferente campeonatonan den exterior.

 

E competencia lo inicia pa 9.30 di mainta, mientras un ora prome lo tin e chens pa warm-up.  Lo por competi den e categorianan 6 aña y menos, 7-8 aña, 9-10 aña, 11-12 aña, 13-14 aña, 15- 17 aña y 18 aña y mas.

Tur landador por inscribi pa 3 evento individual. Lo bay tin tambe Mixed Relays (2 mucha homber y 2 mucha muher) den tur categoría y sin lubida e competencianan di estafette.

Lo premia cu medaya p’e promer tres puestonan.

 

Nos lo por mira clubnan manera Aruba Dolphins, The Orcas, Sports 4U y Stingray Swimming den fuerte bataya cu otro.

Mester bisa cu casi tur competencia lo bay ta riba e 50 meter y algun riba 200 meter, sea ta estilo liber, lomba, barbulet of schoolslag.

 

Un danki sigur na Lotto, e Loteria di Aruba pa medio di Comision di Subsidio cu a subsidia e eventonan deportivo enconexion cu e celebracion riba Dia di Betico.

Top