Diadomingo awor: Concierto Dominical Donny Laclé na Biblioteca Nacional

Tur amante di Concierto Dominical Donny Laclé, y pueblo di Aruba en general ta keda invita pa e concierto di luna di maart 2017.

Manera custumber, esaki lo tuma luga na Biblioteca Nacional, diadomingo awor, 26 di maart.

E programa pa e diadomingo aki ta manera ta sigui.

Pa 11’or di mainta e duo Sweet Inspiration cu ta consisti di Jerry Diaz y Ana Diaz lo habri e concierto. Sweet Inspiration ta un duo cu ta toca den hotelnan na Aruba, pero cu tambe ta haci diferente presentacion durante eventonan cultural y tambe na fiestanan priva.

Sweet Inspiration lo deleita tur presente cu un variacion di musica/canticanan tipico y moderno.

 

E siguiente presentacion ta den man di El Duque Victor Samuel, kende ta un cantante cu un trayectoria internacional hopi largo. Apenas dos siman pasa el a batisa su CD nobo, cu un variacion di cantica y ritmo, yama: Joyas”. Diadomingo nos por disfruta di algun de e canticanan aki, compaña entre otro riba piano pa Vivian Lampe.

 

Pa sera e concierto lo tin actuacion di Grupo Tipico Un Brindis bou direccion di Vicente Tromp. 8 integrante, tocando sinfonia di boca, piano cuarta, bajo, conga, drum y percusion lo brinda e publico un variacion di cantica cu lo kishiki e pianan.

Entrada ta gratis, pero durante pausa ta pasa rond un caha di glas, den cua por haci un donacion.

Tur aña, na luna di november Fundacion Donny Laclé ta otorga diferente studiante di musica un Scholarship pa yudanan desaroya nan talento musical.

 

Un y tur ta bon bini na Concierto Dominical Donny Laclé cu ta cuminsa exactamente 11’or di mainta y lo termina pa 1’or di merdia.

Top