Diahuebs 16 maart 2017 a sali den AWEMainta pagina 3 e articulo: “Centro di Control di Mahuma ta di Reino Hulandes y no di Corsow, A sorprende mundo di aviacion di kier prohibi Aruba Airlines di pasa den su espacio aereo”. Pa: Agustin Vrolijk

Door cu sede di e Gobierno Central di Antias Hulandes tabata na Corsou, mayoria di e servicio pa nabegacion aereo p’e region, Curacao Flight Information Region tabata concentra na Sero Mahuma.

Den e Acuerdo di Cooperacion (1985) firma entre Hulanda, Antias Hulandes y Aruba na ocacion di e Status Aparte di Aruba, a inclui un Protocol di Aviacion.

Un di e topiconan tabata servicio aereo den e region.

 

Aruba a purba yega na un acuerdo cu Corsou pa reparti e region, pero hopi reunion no a logra nada.

Mientrastanto Antias a haci e Departamento cu ta duna servicio aereo un compania anonimo di Gobierno: Dutch Caribbean Air Navigation Services Provider N.V.

 

DC ANSP ta duna servicio na tur avion cu ta pasa/bula den e region cu ta conecta cu e paisnan rond den lama Caribe en cooperacion cu ICAO y Gobierno di Reino Hulandes (cu ta miembro di ICAO).

E servicio aki ta contene tur informacion cu ta necesario p’e piloto di e avion por nabega cu seguridad pa yega Aruba, Corsou o Bonaire o sigui su ruta pa/for Norte, Centro, Sur America o Europa.

 

E informacion cu ta wordo intercambia ta entre otro tocante e tempo, buelo, trafico den aerea, etc.

Si e avion ta pa baha na un di aeropuertonan di ABC, e piloto lo wordo pidi pa tuma contacto cu e toren n’e respectivo aeropuerto.

Mescos cu DC-ANSP na Mahuma, na Aruba nos tin Air Navigation Services Aruba N.V. (ANSA), un compania di Gobierno. Su region ta mas chikito, rond di Aruba.

 

Trahadonan di ANSA, for di e toren na Aeropuerto Internacional Reina Beatrix, ta duna servicio n’e avionnan cu ta yega y sali for di Aruba. P’esaki ANSA ta cobra tur avion.

Mescos cu DC-ANSP ANSA tambe lo por nenga di duna servicio na cualkier avion cu ta bin pa o sali for di Aruba si no ta paga p’e servicio.

Den e Reglanan di Maneho (Beleidsregels juni 2015)  institui pa ex Ministro Otmar Oduber, a wordo stipula cu e AOC lo wordo revoca si e aerolinea di Aruba debe ANSA!!!

 

E espacio aereo ta un asunto di e estado, di Reino Hulandes. Mescos cu e tera y awanan teritorial, e espacio aereo riba nan, tambe ta wordo considera como teritorio di e estado.

Gobierno di Reino lo por sera e espacio aereo (prohibi di pasa den e espacio aereo) pa motibonan di seguridad nacional (national security) o orden publico.

Na 1983 Gobierno Central a sera e espacio aereo, CUR FIR pa tur avion di SLM, esaki tabata un medida di presion ya cu tabatin un problema entre SLM y ALM.

 

E uso di e palabra cu DC-ANSP kier a prohibi Aruba Airlines di pasa den espacio aereo di Corsou no ta corecto. DC-ANSP no tin e autoridad pa prohibi.

E nota di DC-ANSP fecha 15 maart ta bisa corectamente:“Suspension of air traffic services within the tnfc fir to Aruba Airlines”.

Pues Aruba Airlines lo no haya servicio aereo for di DC-ANSP, pasobra e debe DC-ANSP (y ta debe ANSA tambe??).

Consecuentemente avionnan di Aruba Airlines sin servicio di DC-ANSP y pa motibonan di seguridad (safety) lo no por bula den e CUR FIR; esta yega o sali for di Aruba, te ora e debe wordo paga (cu mientrastanto lo a wordo paga).

 

E topico lo tabata un asunto normal di negoshi, sinembargo den e tempo aki e ta haya conotacionnan diferente y si bo tira un saus politico riba dje, hende por bira emocional.

 

 

Leave a Reply

Top