Dialuna 30 di januari 2017 Charla tocante Calypso y idioma na Aruba y region na Scol di Arte San Nicolas

Den cuadro di e di tres “Aruba Calypso Heritage Week”, Community Research Education and Development Project (CRED), ta organisa un charla tocante musica di Calypso y idioma na Aruba y region.

Esaki ta tuma luga riba 30 di januari cuminsando pa 7’or di anochi na Scol di Arte San Nicolas. E charla tin como titulo, “Calipso na Papiamento Si of No?: Social and historical explorations of Calypso and Language on Aruba”.

 

Investigado cultural drs. Gregory Richardson lo haci un analisis social-historico di Calypso y idioma na Aruba uzando diferente ehempel di Centro America.

E presentador lo enfoca riba diferente perspectiva teoretico y tambe haci uzo di letra di Calypso y fragmento di diferente documentario tocante Calypso na Costa Rica, Panama y Aruba.

Lo estrena fragmento di e ‘filmnan’ Calypsonians (2017) produci pa Damien Prouvost y Ramon Morales, Calipso (1991) produci pa Gerardo Maloney y Mighty Lords, Kings and Queens (2015) produci pa Sharelly Emanuelson.

Algun personahe y topico cu lo trata ta e. o. Ringing Bell, Lord Boxoe, Boysie Croes, King Jeon, Jerrino Baas, Mighty Whitey, The Baron, Black Diamond, Calipso y Roadmarch vs Caiso and Soca.

 

Despues di e charla lo tin oportunidad amplio pa dialoga cu otro. Pueblo henter ta keda invita pa atende e charla aki y tambe e Aruba Caiso and Soca Monarch Festival organisa pa MUSICA durante e resto di siman.

Fecha ta dialuna 30 di januari 2017 na Scol di Arte San Nicolas (Gazebo) di 7:00pm pa 9:30pm.

Idioma: Ingles, Papiamento y Spaño. Entrada ta gratis.

Top