Dialuna tin reunion publico pa trata ley di “kansspelen”: Cambio di ley Kiesverordening lo no wordo trata prome cu eleccion benidero

Dialuna awor, Parlamento lo trata e ley di “kansspelen”, cu ta pendiente pa hopi tempo caba. E ley aki ta pa reglamenta e.o. wega di number, of conoci tambe como Catochi, cu nunca a conoce liña di maneho.

Di acuerdo cu Presidente di Parlamento, drs. Mervin Wyatt Ras, Parlamento a cuminsa trata e ley aki caba, pero despues a ser pidi pa warda cune tog un rato, pasobra mester a haci tog algun cambio.

 

Asina mes, ora cu cuminsa trata e ley dialuna awor, ainda lo por tin algun cambio, segun Presidente di Parlamento. T’e intencion pa trata algun otro ley, pa loke ta trata husticia, pero mirando e tempo, probablemente esakinan lo keda pa despues.

 

Tin den tapara tambe e ley di Kinder-Centra (Crash), pero Parlamento ta wardando algun requisite. Pendiente tambe t’esun di Functie-Huis y tin pa trata tambe, e ley pa presupuesto pa fondo di enseñanza.

 

KIESVERORDENING

Pa loke t’e cambio di ley di Kiesverordening, cu Dangui Oduber a splica di kier un cambio, ainda prome cu eleccion, p’asina adelanta tur candidato sa, cu esnan cu haya mas voto, tin derecho pa haya representacion den Parlamento.

 

Dangui Oduber cu e ley aki, lo yuda baha e tension cu tin den seno di MEP, unda ya caba tin algun menasa, pasobra tin candidato a laga sa caba, di kier ta den Top-10 of nada. Pero si e cambio di ley di Kiesverordening keda aproba, lo elimina e sistema di secuencia riba lista lo por drenta Parlamento.

 

Puntrando Presidente di Parlamento, ki dia e tratamento di e ley aki ta bira agenda, despues cu el a bay Raad van Advie y a bin bek Parlamento, segun drs. Mervin Wyatt-Ras, pero tin varios pregunta haci cu Dangui Oduber mester bay contesta ainda.

Esey ta un procedura cu sigur lo tuma su tempo, sigur ora di trata un ley iniciativa. Ora cu tur pregunta wordo contesta, e ta sigui su rumbo. E tin un trayectoria pa cana, cu manera indica, lo no wordo trata prome cu eleccion dia 22 di september awor.

 

 

Top