Diasabra anochi nos a recibi e tristo noticia cu Rev. Pastoor Tony R. Peralta a fayece na Manila, Filipinas

Diasabra anochi, 4 di maart ultimo, parokia di Paradera a ricibi e tristo noticia cu Rev. Pastor Tony Peralta, ex-Pastor di misa Sta. Filomena y tambe misa Sta. Teresita a fayece na Manila, Filipinas.
Rev. Pastor Tony a nace dia 18 di april 1944. Dia 28 di februari 1988 Pastoor Tony Peralta a yega Aruba y dia 6 di maart di e mesun aña el a bira Pastoor di Parokia di Paradera.

E mesun aña, esta dia 1 di augustus Pastoor Tony a lanta “Comision Drecha Misa”. Den menos di un aña Misa Santa Filomena a wordo restaura. Su restauracion tabata un milager grandi y increibel: Un milager di cooperacion, generosidad y amor.
Na aña 1990 a cuminsa e restauracion paden di misa y na april di e mesun aña a celebra Siman Santo den misa restaura.
Pastoor Tony a cuminsa cu Caminda di Cruz riba cayanan rond di misa pa cuminsa cu serie di actividadnan religioso den e aña di Hubileo di Oro di parokia.

Den su administracion di parokia, el a instala e grupo di ministro extraordinario di Eucaristia, a yuda lanta e grupo di lesador hubenil y infantil, reforsa e Koor Sta. Filomena y a yuda lanta 3 koor nobo. Cu cooperador y gruponan di oracion di parokia, el a sigui bishita e casnan di famia.
Su predicashinan tabata un inspiracion pa un y tur pa biba mihor y pa ta un bon yiu di Dios.
Na juli 2002 Pastoor Tony a bay traha na Misa Sta. Teresita te cu 2008 y despues na 2008 Pastoor Tony a bay bek Filipinas.
Pastoor Tony tabata un persona cu a siña masha liher Papiamento, tambe e tabata papia Hulandes, Ingles, Latin, Griego y Spaño masha bon mes.
Pastoor Tony tabata un ferviente hungador di tenis. Despues di un lucha basta largo contra cancer Pastoor Tony a fayece.
Pastoor Tony a bay sosega, pero atrabes di su obranan nos tur lo keda recorde.

Diadomingo, 10 di maart pa 5.30 di atardi lo tin un misa Memorial na Misa Santa Filomena. Un y tur ta cordialmente invita especialmente tur esnan cu a conoce Pastor Tony. Cu pastor Tony Peralta sosega na paz.

Top