Dienst Huur- en Consumentenzaken ta informa: Resultado di aña 2016 di nan trabao haci

Dienst Huur- en Consumentenzaken ta un servicio completamente gratis di Gobierno cu tin como tarea pa e.o. yuda cliente cu problema of inkietud riba asunto di huur of consumidor. Den aña 2016 Dienst Huur- en Consumentenzaken a atende 1859 cliente cu informacion general, intermediacion y e servicionan di huurcommissie.

 

E servicio di huur den 2016 a atende un total di 1771 cliente cu nan problema of inkietud riba asunto di huur, di cual 471 a entrega un peticion pa un servicio di huurcommissie.

Esaki ta nifica cu por lo menos 1300 cliente a scoge pa intermediacion of informacion general pa resolve nan inkietud riba asunto di huur.

E servicionan di huurcommissie ta terminacion di huur, aumento di prijs di huur y stipulacion di prijs di huur.

 

Den 2016 huurcommissie a ricibi 350 peticion pa terminacion di huur, 116 peticion pa stipulacion di prijs di huur y 5 peticion pa aumento di prijs di huur. Mayoria peticion pa terminacion di huur cual t’e servicio mas popular di huurcommissie ta pa motibo di:

Retraso den pago di huur (58%); pagamento malo di huur (11%) esaki ta p.e. ora no ta paga na tempo of ta cumpli cu e pago den mas cu un pago; relacion entre doño di propiedad e inkilino ta kibra (8%); e doño di e propiedad kier haya e propiedad bek pa uzo personal (7%);

e doño di e propiedad kier haci trabao di renobacion na e propiedad (6%) y

por ultimo e doño di propiedad kier termina e acuerdo di huur segun condicionnan di e contract di huur (9%).

 

E servicio di consumidor den 2016 a atende un total di 88 consumidor cu nan keho.

Mayoria registracion di keho a sosode personalmente of via telefon. Mayoria consumidor ta acudi Dienst Huur- en Consumentenzaken pa intermediacion.

Mayoria keho di consumido ta trata: Producto defecto y e garantia riba esaki (30%);

Incumplimento di acuerdo of servicio di p.e. garashi auto of contratista (27%);

Keho relata na prijs of gastonan di producto of servicio (13%).

 

E keho di consumidor den 2016 mas tanto tabata procediente di supermercado, garashi di auto, agencia di biahe of aerolinea, tienda cu ta bende aparato electronico, servicio di telecomunicacion of Internet y construccion.

Ademas di consumidor e seccion di consumido ta atende negoshi tambe cu pregunta of inkietud, conseho huridico, revision di documento legal, etc.

 

Mas informacion riba e servicio y trabao di Dienst Huur- en Consumentenzaken ta obtenibel riba website (www.dhc.aw) y riba facebook.

Pa mas informacion riba leynan cu ta trata derecho di consumidor, haci un keho of registra un abuso contra consumidor yama of pasa personalmente na Dienst Huur- en Consumentenzaken na Wayaca 33, tel: 582-9914, of e-mail nos na info@dhc.aw.

 

Leave a Reply

Top