Diferente trabou andando riba tur accomodacion deportivo restora bou St. Fundacion Facilidadnan Deportivo

Recientemente ing. Junior Tromp, kende ta Director di St. Fundacion Facilidadnan Deportivo, den cuadro di maneho di Ministro di Deporte a duna un presentacion n’e Hunta Directiva di St. Fundacion Lotto pa Deporte esaki relaciona cu e trabounan di construccion, renobacion y mantencion cu ta wordo haci n’e accomodacionnan deportivo cu ta cay bou di e maneho di St. Fundacion Facilidadnan Deportivo.

 

Centro Deportivo Frans Figaroa

Mester bisa cu e trabou mas grandi aworaki ta tumando lugar riba Centro Deportivo Frans Figaroa na Noord.

A cuminsa cambia e dak di e tribuna mientras e trabounan di mantencion y verfmento a inicia. Tin un carga grandi di plachinan di hero p’e dak cu ya caba a sali for di Alemania y ta spera cu dentro di tres siman esakinan lo ta na Aruba.

 

A manda busca un scoreboard completamente nobo cu awor ta na Miami y otro siman lo ta na Aruba. Asina cu finalisa e trabounan riba e dak lo instala esaki.

N’e edificio di Angel Botta tin algun reparacion mester wordo haci p’asina garantisa e seguridad di tur cu ta frecuenta e edificio aki.

 

Segun Junior Tromp pa seguridad di un y tur y pa sigura cu tur e trabounan bay sin ningun obstaculo lo mester sera Centro Deportivo Frans Figaroa na Noord pa un temporada di tres siman maximo. Ta spera cu e trabou an keda cla rond di 19 di mei proximo.

 

Tereno di futbol Jose Wever na Yara

N’e tereno di futbol Jose Buchi Panama Wever na Yara tambe ta finalisando cu algun trabou cu e keda pendiente.

E trabou di verfmento t’esun mas grandi y esaki ya a inicia. E tralie nan rond di e compleho tambe lo bay wordo poni.

Segun sr. Tromp lo mester haci algun cambio dor di Elmar, DOW y DIP pa cu e instalacion y conecion di coriente na henter e compleho, incluyendo e poste nan di luz.  Por ultimo rond di e stadion lo basha graniet.

 

E demas complehonan restora bou di FFD

Na Stadion di Crismo Angela/Nadi Croes tambe lo haci cierto trabou riba e dak unda lo cambia e plachinan pa uno nobo.

Na Parke Curazon Jaburibari a constata algun caminda unda tin e asina yama ‘sinc holes’. Lo cuminsa tambe cu algun trabou di mantencion riba e edificio unda nos grandinan ta haci ehercicio.

Por ultimo riba e pacour tin awa ta para y pronto lo busca un solucion pa cu esaki.

N’e parke di baseball/softbol na Pos Chiquito ta hibando combersacion cu DIP esaki p’e “meetbrieven” y e traspaso di ambos compleho pa FFD.

E ultimo compleho cu lo haci algun trabou di mantencion preventivo ta Joe Laveist Sport Park y aki lo sera e cancha di basketball pa un renobacion completo p’asina scolnan den becindario por haci uso di esaki.

 

Asina nos por mira cu tin diferente trabou di construccion, renobacion y mantencion ta tumando lugar riba e accomodacionnan deportivo cu ta cay bou di e maneho di St. Fundacion Facilidadnan Deportivo. Un danki na Minister di Deporte, dr. Alex Schwengle su vision & aporte pa cu e facilidadnan deportivo.

 

Top