Dilanti Paradera Restaurant, tres hoben ta herida chauffeur y horta van di compania

Diabierna den oranan di merdia, a pidi asistencia di Polis pa un caso di ladronicia cu violencia na Paradera Restaurant.

 

Na yegada, a topa cu chauffeur di un van Hiace Toyota color blanco, kende a splica cu el a ser agredi pa tres hoben cu despues a subi e van y bay cu ne. E van ta pertenece na e compania Superior Tabacco Company. A cuminsa c’un buskeda p’e van y e hobennan responsabel.

 

Por medio di un sistema digital a logra localisa e van dilanti un cas na Moko. Unidadnan policial a wordo dirigi n’e sitio y a topa cu e van, pero e hobennan mes ya no tabat’ey mas.

Segun informacion, un di e hobennan ta busca pa Husticia. Tabatin un “safe” den e van, cual e hobennan no a logra habri.

 

E van a wordo confisca y transporta pa Warda di Santa Cruz. Departamento Tecnico di Polis tabata encarga pa haci un investigacion rib’e van.

Mientras tanto, personal di Ambulance a atende cu e chauffeur victima di e ladronicia y transport’e pa Hospital.

Top