DIMAS cu presentacion di reorganisacion pa Hunta di ATIA

Departamento di DIMAS ta trahando duro riba mehoracion pa brinda un mihor servicio na su clientenan.

Diamars ultimo den un reunion fructifero nan a presenta n’e miembronan di Hunta di ATIA e proyectonan cu ta tumando lugar den e departamento.

 

Un di e proyectonan t’e digitalisacion y automatisacion di procesonan di aplicacion pa permiso. Conhuntamente cu KPMG nan lo ta introduciendo esaki den varios fase y e expectativa ta pa finalisa esaki den luna di april.

E automatisacion di proceso lo haci posibel pa aplica online enbes di mester fisicamente bishita e oficina di DIMAS.

 

Ademas ta trahando riba simplificacion di e proceso, reorganisacion di e departamento y un sistema cu lo haci’e mas facil pa produci estadisticanan necesario pa haci planificacion riba termino medio y largo posibel.

E siguiente paso lo ta conecta e sistemanan di diferente departamento cual lo haci e control riba legitimidad di permisonan mas fasil y transparente.

 

ATIA a trese dilanti e preocupacion pa cu imigrantenan cu ta wordo busca di otro paisnan pa traha den cierto sector pa cual no por haya hende local, pa loke ta nan edad.

Ora personan di edad halto ta imigra pa Aruba, nan contribucion pa fondonan manera SVb y AZV ta limita, cual ta causa cu ora nan yega edad di pensioen, nan tin cu biba di un suma minimo.

DIMAS a splica cu ta trahando riba un profil pa imigrantenan cu enberdad ta inclui edad di e persona, pero esaki ta solamente un di e varios propuestanan riba mesa pa cu e problematica aki.

ATIA ta aplaudi implementacion di e mehoracionan aki, no solamente p’e mihor servicio cu e lo trece, pero tambe p’e mihor control y transparencia cu lo resulta.

 

Top