DIMAS: Na caminda pa DIMAS 2.0

Den 2017 DIMAS su organisacion – cu sosten di Minister Sevinger y FDA – ta sigui cu e implementacion di diferente trayectonan pa mehoracion di su servicio, proceso y productonan.

 

Pa por bay na e otro nivel di servicio, informacion y productonan na DIMAS a inverti den diferente proyecto:

A reemplasa e ekiponan y servernan fin di aña pasa (hardware);

A digitalisa e archivo di DIMAS;

A introduci un sistema di regulacion automatico di cliente (Qflow);

Ta bay implementa un sistema di registracion nobo (software);

Ta trahando riba un website mas moderno;

Ta prepara pa ta gelink y por valida informacion digitalmente cu otro departamentonan.

 

E enfoke principal den 2017 di DIMAS lo ta:

1.) Pa gana eficiencia y efectividad ora di procesa peticionnan di estadia dor di probecha di e beneficionan y oportunidadnan cu digitalisacion ta brinda.

Un di e resultado cu kier logra ta pa structuralmente reduci e termino cu ta tuma pa trata un peticion pa permiso. Tambe ta e intencion pa bin cu inovacion di producto y servicio.

 

2.) Pa percura pa un mehoracion di e experiencia general di e clientenan (perceived quality of service) y den e cuadro aki ta sigui monitor y midi periodicamente diferente factor cu ta relevante, manera:

E tempo di espera pa cita;

E tempo di espera den e sala na DIMAS ora cu tin cita;

E tempo di espera den sala di DIMAS pa servicionan cu no ta rekeri di cita;

E facilidad di DIMAS (parkeo, sala di espera, etc.).

 

3.) Pa percura pa un mehoracion di e contacto, servicio y comunicacion cu nos clientenan. Aki lo haci uzo di diferente plataforma, media, website, Facebook.

E ta hopi esencial tambe cu cada cliente desde awor percura pa tin su propio email adres via di cual DIMAS lo por keda den contacto cu ne prome, durante y despues cu e haci un peticion pa permiso na DIMAS.

 

DIMAS den 2017 por lo tanto ta drenta un fase transitorio y ta na caminda pa “DIMAS 2.0” unda cu tin e ambicion di elimina e uzo di papel por completo.

Den e trayectoria aki DIMAS lo ta bay ta comunica mas frecuente y lo anuncia e diferente cambio relaciona cu digitalisacion di su proceso, producto y servicionan.

DIMAS, Departamento di Integracion, Maneho y Admision di Stranhero (operacional desde 1 di juli di 2006) su oficina ta situa na Oranjestad, na Paardenbaaistraat 11 (ex edificio di Ontvanger).

 

DIMAS ta encarga pa procesa tur e aplicacionnan cu ta regarda (extension) di estadia temporario of definitivo na Aruba sea cu ta pa traha of no.

 

E orario di oficina di DIMAS ta di dialuna pa diabierna di 7:30am – 12:00pm y 1:00pm – 4:30pm.  DIMAS su call center 5221500 ta alcansabel durante orario di oficina.

Tambe por dirigi un email na dimas@aruba.gov.aw.

 

Pa keda na altura di (cambionan den) procedura, proceso, maneho, download formulario y lista di rekisitonan y tambe pa traha cita online pa e diferente servicio y producto, bishita regularmente www.dimasaruba.com. Na caminda pa DIMAS 2.0!

Top