Diputado den Heyer di Bonaire impresiona cu trabou di proyecto BoBario na Aruba

 

Diputado Nina den Heyer, encarga cu, e.o., Asunto Social na Bonaire, tabata di bishita na Aruba pa celebracionnan di Himno y Bandera na Aruba. Durante su bishita el a probecha pa tene diferente reunion relaciona cu su trabounan na Bonaire.

Un di e reunionnan aki tabata dialuna mainta cu funcionarionan Servicio Pa Comunidad y Bario (antes BoBario) na MFA Noord.

 

Sra. Nina den Heyer a splica cu nan tambe ta trahando riba un plan pa barionan di Bonaire y tabata kier a scucha di e experiencia extenso cu Aruba tin riba e tereno aki, con a inicia cu e trabounan te na con a desaroya esaki cu un resultado sumamente exitoso na Aruba.

E reunion a tuma lugar cu Ruth Tromp-Schoop, Jacky Agunbero y Raoul Gravenstijn di Departamento Servicio Pa Comunidad y Bario (SCB), kendenan a duna Diputado den Heyer un presentacion detaya di nan trabounan na Aruba.

 

Sra. Nina den Heyer su cartera como Diputado ta ensera diferente cartera, entre nan Asunto Social, Enseñansa, Asunto Huridico y Vivienda Popular. El a splica cu su bishita tabata un bon momento pa topa cu e funcionarionan di BoBario.

“Mi a keda hopi impresiona, mas di scucha con basico nan a cuminsa y con grandi nan ta awor. E ta un inspiracion,” e Diputado a expresa.

El a agrega cu “sigur loke cu nos a siña aki na Aruba ta un experencia pa nos y mi por bisa hasta e ta algo cu nos por incorpora Bonaire, kisas den e plan pa cu barionan,” e mandatario a expresa di un forma hopi contento cu resultado di su encuentronan aki na Aruba.

 

Despues di a reuni cu manager di MFA Noord, Richard Tromp, e grupo a bishita e mini cancha deportivo na Madiki, unda cu Diputado den Heyer a haya un mihor bista di loke SCB ta haci den practica p’e barionan, basa riba e vision di Prome Minister Mike Eman y su Gabinete.

Durante e encuentro mainta tempran na MFA Noord, sr. Richard Tromp, a splica tambe con un edificio manera MFA ta sirbi comunidad.

Principalmente a duna un splicacion di tur e servicionan importante cu por wordo ofreci den un solo edificio, den un area central.

 

“Nos a intercambia idea y a duna sugerencia riba un producto pa duna un bon servicio na comunidad. E Diputado a keda encanta cu e vision tras di un edificio MFA,” Richard Tromp a duna di conoce.

Diputado den Heyer despues di e reunion, a sigui bishita diferente otro proyecto di BoBario hunto cu funcionarionan di SCB.

 

 

Top