Director di FFD, Ing. Junior Tromp: A tene un destaho publico cu 4 compania presente

Ta bay renoba Piscina Olimpico Rolly Bislik na Savaneta y pa cu esaki a tene un destaho publico. A cuminsa cu e proceso pa basta luna caba, Stichting Fundacion Facilidadnan Deportivo (FFD) a acerca ACE Engineering Firm pa prepara e bestek. Nan a prepara esaki y basa rib’e recomendacionnan di WEB, cual WEB a haci un assessment pa nos Minister di Deporte Dr.Alex Schwengle y FFD.

 

E hoya di proyecto aki pa Savaneta ta riba iniciativa di Minister di Deporte dr. Alex Schwengle cu ta aprecia e deporte di landamento, especialmente bou di nos hubentud. E prome step tabata e assessment dor di e profesionalnan di WEB

 

A base di e recomendacionnan di WEB, ACE Engineering a traha ful un bestek. FFD a invita diferente compania pa participa na e destaho publico. Na e destaho publico tabata presente 4 compania, cual tabata CND Construction, Emeco N.V., Chucho Contractor y Crystel Pools. Naturalmente hunto cu ACE Engineering Firm cu a prepara tur e bestek y a conduci tur tender pa FFD.

 

Dia 29 di augustus 2017 tabatin e reunion di informacion y dia 5 di September 2017 lo keda publica e nota cual lo tin tur e preguntanan ricibi. E companianan lo por entrega te cu dia 15 di September 2017 y asina cu e prijsnan drenta, e compania ACE Engineering lo prepara un “gunningsadvies.” E gunnings advies no necesariamente ta esun di mas abou lo hay’e, pero ACE Engineering ta basa su mes riba tur rekisito necesario, criterianan y cu ta cuadra cu e bestek traha. FFD lo ricibi e recomendacion for di ACE Engineering a base di e bidnan entrega.

E intencion ta pa dia 15 di september 2017 pa invita un notaris pa supervisa e proceso di entrega di bidnan.

 

Esaki lo pone cu FFD lo trece tur e puntonan aki cerca e directiva y aki lo tuma un decision y mira si por sigui cu e consehonan di ACE Engineering.

“Normalmente nos ta sigui’e continuamente. Mi ta prefera di warda te ora cu e directiva tuma e decision final”, asina Ing. Junior Tromp, director di FFDA, a indica.

 

E mantencion ta e parti mas primordial y den esaki nan tin e parti cu ora di entrega documentonan y prijs, mas cu claro nan ta haya un service contract y nan mester cumpli cu ne. Ora di entrega un trabou, semper tin 6 luna cu nan ta keda vigila e proyecto, service esaki. Despues e mesun companianan ta haya e oportunidad di entrega un oferta pa mantene e facilidadnan.

 

“Esey semper ta un punto di kibra cabes y ora nos yega asina leu, nos lo yega riba e punto di mantencion”, el a bisa. E punto di mantencion ta esun di mas importante y esaki lo keda treci padilanti, pasobra mayoria di loke tin ta pa motibo di mantencion.

 

Lotto lo financia e proyecto aki, danki na e bon resultadonan di e renegociacion cu Canadian Bank Note Ltd. di e cambio den  e contract existente cu a culmina na januari 2017.

Un pabien grandi na e bario di Savaneta & especialmente nos atletanan den natacion. Ban sigi sostene e vision di nos Minister di Deporte dr. Alex Schwengle.

Top