Director di IMSan, dr. Joel Rajnherc: Ta trahando cu Baptist Health South Florida pa mehora calidad di servicionan pa pashentnan cu cancer

Recientemente, dr. Joel Rajnherc a regresa for di un bishita na Baptist Health Center na Miami. Obhetivo di e bishita tabata pa cera conoci cu e Baptist Miami Cancer Institute nobo cu a inaugura na januari ultimo. E centro ta un edificio cu tin tur ekipo aden, cu a costa 5 miyon dollar y cu tur material necesario pa trata pashentnan di cancer.

Director di IMSan, Dr Rajnherc a indica cu nan tin 5 aña caba trahando hunto cu Baptist Health South Florida pa desaroya un plan maestro pa tratamento cu radioterapia pa IMSan.

 

“Nos ta hopi leu, financiamento ta casi rond y p’esey na e momento aki ta oportuno pa hiba dokternan di Oncologia pa mira kico Baptist por brinda nos, si acaso nos por yega na un partnership cu nan”, asina dr. Joel Rajnherc a remarca.

Cu e partnership aki Aruba lo mehora e calidad di servicio cu ta brinda na pashentnan, na tur cu ta sigura via AZV, elevando calidad di cuido y mas importante ta cu lo por haci radioterapia aki mes na IMSan y lo no mester manda pashentnan afo mas.

 

Durante di e bishita a pone hopi enfasis riba e calidad di radioterapia cu ta ofrece na Baptist, cu lo ta un intervencion nobo pa nos isla pa loke ta tratamento di cancer.

Baptist ta dispuesto pa duna Aruba un bon man, pero tratamento di cancer no ta solamente radioterapia. Tratamento di cancer ta encera hopi cirugia, kimoterapia, cu ta e parti di medicina y imunoterapia. Tur esey ta bou di un solo dak na Baptist.

 

Awor durante di e bishita por a observa cu Baptist tambe tin tur cos bou di un dak.

Pa nan e tabata algo tremendo pa mira con leu nan ta y kico nan tin. E ta e unico instituto na mundo cu tin tur aparato pa trata pashent cu cancer bou di un dak.

Tin diferente sorto di ekipo: nan tin e cyber knife, gamma knife, liniare versnellers.

Kiermen pashent ta wordo yuda manera mester ta.

 

Baptist Health South Florida a caba di cera un aliansa cu Memorial Sloan Kettering Cancer Center, cu ta un grupo masha grandi di Noord Oost di Merca.

Esaki ta e instituto mas grandi, mas renoba cu tin aworaki pa trata cancer. Oncologonan di Aruba ta buscando nan ayudo pa asina por yega mas leu den  tratamento di pashentnan, specialmente ora cu observa cu e tratamento brinda ta top of the line.

 

“Si yega na colaboracion cu nan, lo encera cu lo duna nos conseho riba con por mehora calidad di servicio cu nos ta brinda”, dr. Joel Rajnherc a duna di conoce.

E Oncologonan a haci hopi pregunta masha critico y esey ta loke dr. Joel Rajnherc tabata desea. “Tur hende a regresa masha entusiasma. Mi ta orguyoso di mi coleganan, di e actitud hopi positivo y e transparencia di Baptist”, el a enfatisa.

Nan a mustra tur cos, no tabatin secreto, tur pregunta haci a haya contesta masha honesto. “Mi ta considera esaki un paso grandi pa nos haya e miho cooperacion, e miho tratamento pa nos pashentnan den IMSan”, asina dr. Joel Rajnherc a termina bisando.

Leave a Reply

Top