Ditto Acosta: Mini canchanan deportivo cu yerba artificial ta atrae hopi mucha na veld

Ministerio di Asuntonan General di Prome Minister Mike Eman tin un persona cu ta encarga y coordina tur loke cu tin di haber cu deporte. Ta trata aki di Ditto Acosta, kende ta coordina tur e proyectonan deportivo cu ta wordo realisa dor di Ministerio di Asuntonan General den barionan, manera drechamento di cancha, construccion di tribuna y e proyectonan di mini canchanan deportivo cu yerba artificial.

 

Acosta yen di entusiasmo a recorda con e proyecto di mini canchanan deportivo a cuminsa un poco mas cu dos aña pasa na momento cu Prome Minister Mike Eman tabata canando den e barionan y bishitando clubnan deportivo, scuchando habitantena kico ta nan deseonan.

Cerca e dirigentenan di clubnan semper tabata existi e deseo pa un cancha deportivo chikito di yerba artificial, cual por wordo uza principalmente dor di e deportistanan mas hoben.

E tabata un idea cu a cay den bon tera cerca Prome Minister Eman, kende a pone su team deportivo, lidera pa Ditto Acosta, traha riba un plan con pa hinca e proyecto aki den otro. Durante un aña y mey a traha pa identifica tur e clubnan cu tin e necesidadnan aki.

Aworaki ta bay realisa 6, den cooperacion cu Comite Olimpico Arubano (COA).

 

Acosta a splica cu den e estudio haci, a haci un evaluacion pa mira cual ta e scolnan den bisindario cu lo por haci uzo di e mini-canchanan aki den oranan di mainta, p’asina mas hopi persona por beneficia di esaki. Mientras cu scolnan por uz’e mainta, e club ta tuma su uzo den oranan di atardi pa anochi.

“E clubnan mes lo percura pa mantencion di e canchanan aki y tur e muchanan di e bario por haci uzo di e veld,” Acosta a bisa.

 

E proyecto aki ta uno cu COA a tuma over di Gobierno aña pasa. COA International via di su organisacion local a haci un contribucion cu cual Gobierno ta logra construi 6 cancha.

Tur e clubnan cu a bini na remarca a wordo informa cu nan mester percura p’e fundeshi, mientras cu despues ta sigui pa pone yerba, heki, wayanan y colomnan pa luz.

E ultimo parti aki di iluminacion ta trahando riba dj’e.

“Esaki ta un bunita proyecto y nos a haci esaki caba na Centro di Bario Brazil, cu FCCA a realisa algo asina na Bushiri y Madiki. Na RCA tambe tin un mini-turf. E experiencia ta cu unabes tin un cancha asina, e muchanan den bario ta haya animo pa yega na e club y hunga futbol, pasobra e ta riba yerba. E ta diferencia pa hunga futbol riba yerba cu riba santo”, Acosta ta splica.

 

E tipo di canchanan aki por wordo uza den forma hopi eficiente. Mientras scolnan ta uza e cancha den dia, atardi e club ta uza esaki pa su miembronan y den oranan lat gruponan priva por huur e cancha, manera ta sosode na RCA. Aki tin un grupo di 70+ ta uz’e pa practica loopvoetbal cu ta mantene nan den condicion. Acosta a splica cu practicamente tur anochi e mini cancha di futbol di RCA ta wordo verhuurd dor di gruponan priva.

“E cancha aki tin hopi beneficio, di muchanan chikito cu ta bay scol, miembronan di e club, muchanan den bario pero tambe grandinan cu por haci uzo di e cancha aki na Arsenal”, Acosta ta termina.

 

Leave a Reply

Top