Docentenan di Centro di Observacion a haya training special

E tarea di un comunidad y su sistema di educacion ta pa duna muchanan educacion y guia pa nan por bira adultonan cu lo forma parti di e mesun comunidad aki den futuro aportando di forma positivo na progreso di nos pais.

Pero tin biaha tin muchanan special cu tin cierto necesidad apart cu hopi biaha no por wordo atendi den un klas di 30 mucha.

P”esey a introduci e Centro Multi-disciplinario y e Centro di Observacion sosteniendo e muchanan special aki pa den futuro nan tambe por forma parti di e comunidad y sociedad.

 

Hopi di e muchanan aki tin problemanan psiciatrico of di control di emocion cu no ta haci’e facil pa atende cu nan y yuda nan.

Cu esaki den mente e departamento cu ta atende cu e centro a dicidi di trece un experto riba e tereno aki pa yuda esnan cu ta traha directamente cu e muchanan aki riba un base diario, pa duna nan e hermentnan necesario pa sostene nan den nan trabao di tur dia.

 

Interim Manager di Centro di Observacion di Bureau Multidiscplinaire Centrum, Indira Falconi a splica cu ta dunando e empleadonan un training di dos siman cu meta di duna e personal sosten. “Sosten pasobra cu nan ta traha cu muchanan cu no por regula nan emocion y ta bira hopi agresivo.

Nan ta siñando kico pa haci ora tin incidentenan — e “Safety Care” — ta siña con pa anda na un manera respetuoso, positivo y afectivo p’e muchanan siña maneha y controla nan emocion of e comportacion agresivo,” el a elabora.

 

Falconi ta amplia bisando cu n’e Centro di Observacion tin un kleuterklas, un Eerste y un Tweede klas cu t’e categoria di edad di 4 te cu 10 aña.

Cada klas tin 8 mucha… y bo ta pensa cu esaki ta bay ta hopi facil, pero tur e muchanan aki tin problema of psiciatrico of problema cu regula nan emocion.”

 

“Despues di e training ta sigui cu un “Case Counseling” riba dialuna cu diamars. Aki e trainer ta bay guia nos na un manera adecua con pa atende un situacion di crisis of un incidente riba e manera teurapeutico y adecua”, Falconi ta bisa.

“Hunto cu esaki dos colega di e team, e psicologo y unit manager lo bay hunto cu e trainer di Merca, Erin Divine, den tur e klasnan y ta scoge dos caso pa wak kico por t’e alternativanan p’e edificio y p’e muchanan pa de-escala e incidentenan,” el a agrega.

 

E Interim Manager ta bisa cu pa awor e training aki ta p’e centro so… “pero ta haya cu realmente e ta recomendabel pa tur otro scol y barionan na Aruba.

Hopi mayor y scolnan ta puntra con pa anda cu e mucha pasobra den un klas cu 30 mucha si un of dos di nan bira agresivo y abo como maestra ta duna les y bo no por duna les y mester bay atende.

E training aki ta duna e hermentnan cu tin mester pa tipo di incidentenan asina.”

 

Board Certified Behavioral Analyst, Erin Divine a splica cu su meta aki ta pa siña e empleadonan tocante “Safety Care” ora ta traha cu muchanan special…’muchanan cu no ta siña manera un mucha tipico.

Asina ta nan mester hermentnan riba con pa re-enforsa comportacion bon, apropia y deseabel y con pa maneha como tambe con pa maneha y preveni situacionnan peligroso cu nan por haya nan mes confronta cune.”

 

Erin Divine a splica cu e prome siman nan ta haya tur e parti teoretico sigui pa training den veld… “lo mi traha cu e empleadonan y dos di e studiantenan cu mas reto di comportacion y asina eherce loke cu nan a siña.”

E experto riba e tereno a bisa cu te cu awor tur cos ta bayendo hopi bon. Un di e puntonan cu el a remarca ta cu despues di e training e “feedback” cu el a haya ta cu te cu awor e empleadonan tabata manehando e situacionnan na un manera diferente y cu desde cu nan a cuminsa uza loke cu nan a siña e resultadonan ta hopi mas positivo.

 

“Nan lo mester por sigui aplica e procedura nobo cu nan a siña y mester por corda cu e muchanan ta studiante y cu nan tambe ta siñando… “nan no ta perfecto y tin biaha e por ta frustrante cu e muchanan aki, pero awor nan tin un curriculum cu nan por apoya riba ora cosnan bira duro,” Erin Divine a bisa.

 

Top