Dos homber stranhero deteni pa sospecho di “Skimming y Harvester”

WILLEMSTAD – Diadomingo, 2 di juli 2017, alrededor di 19:00pm, Central di Polis a dirigi unidadnan policial pa un mashin di ATM na un banco den area di Rio Canario.

Na yegada di e prome unidad n’e sitio nan no a topa cu nada particular. E unidad a sigui cu nan patruya y riba Gosieweg na un di e ATMnan di e mesun banco e agentenan a mira un homber na un auto para.

Tanto e homber como e vehiculo tabata cuadra cu e descripcion cu e agentenan a haya for di Central. Despues di un investigacion e homber D.C.D.S. di 44 aña di edad, naci na Rumania cu nacionalidad Italiano a keda deteni.

Mientras tanto, un otro unidad cu tambe a dirigi nan mes na e ATM na Gosieweg, a mira un otro homber alehando for di e ATM menciona, cu ta cuadra cu e discripcion. E homber aki tambe a keda deteni. Ta trata di V.D. di 48 aña di edad, naci na Rumania.

 

Durante nan detencion, a haya e sospechosonan cu diferente carchi di banco y placa cash (dollar) den nan poder. Polis a confisca tanto e carchinan, e dollarnan y e vehiculo cu e sospechosonan tabata core aden pa mas investigacion. E agentenan a bay warda cu e dos sospechosonan.

Na momento cu e sospechosonan tabata na warda un di nan e homber D.C.D.S. a mira e chens pa huy bay. Mesora Polis a start cu un persecusion tras di e sospechoso, cu a keda deteni un biaha mas riba Martiniqueweg.

 

A presenta e dos sospechosonan dilanti di un Fiscal Auxiliar cu a ordena nan encarcelamento pa mas investigacion. E investigacion den e caso aki ta continua.

Un suplica ta bay na abo ciudadano, si bo nota un actividad sospechoso na cualkier ATM, meld esaki mesora na Polis na e number di telefon 917.

Top