Dos verkeersplateau a wordo construi na Angochi pa baha velocidad di auto

Dialuna den oranan di atardi Prome Minister Mike Eman tabata den bario di Angochi pa dos evento. E prome tabata e groundbreaking di e mini-cancha deportivo y inauguracion oficial di dos verkeersplateau cu a wordo construi recientemente.

“Mi ta hopi contento. Un palabra di gradicimento na DOW p’e hecho cu e lista di e proyectonan aki cu nos ta entrega na nan despues di bishita na barionan, poco-poco ta kedando cla.

Den tur e barionan cu a haci peticion pa verkeersplateau of iluminacion, ta hayando esakinan”, Prome Minister Mike Eman a bisa den presencia di un grupo di habitante di e bario.

 

E mandatario a recorda tambe, den cuadro di e proyectonan aki, cu algun luna pasa ora el a bay Hulanda, a firma un acuerdo cu Minister Plasterk pa aloca e resto di fondonan di FDA pa mehora infrastructura, specialmente camindanan afecta pisa p’e yobidanan recien, pero tambe p’e areanan unda cu pa algun aña caba ta pidiendo caretera.

“Ta berdad tambe cu e cantidad ta hopi grandi, p’esey nos a cuminsa cu e cantidad cu nos por a aloca denter di e presupuesto cu nos a logra combina cu e resto di placa cu a keda di FDA”, e mandatario a bisa.

 

En total a pone 2 verkeersplateau, pa yuda baha velocidad di e autonan cu ta pasa den e area aki, cerca di e veld unda tin hopi mucha ta hunga. E atardi ey e mandatario a sinti un alegria grandi di mira cu su Gobierno a cumpli cu e bario di Angochi.

“Mi ta hopi contento cu awe mi ta para aki cu rumannan Morillo na Angochi, unda verkeersplateau a wordo poni. Hopi locual nos conoce den cambionan den Angochi y deporte ta danki na empeño di e famia aki. Cada bes cu mi bishita ta haci un apelacion riba Gobierno pa duna un man”, el a sigui bisa.

 

A recorda proyectonan manera renobacion di clubhuis di Arsenal, construccion di tribuna y awo ta realisacion di e mini-cancha deportivo (veld artificial) cu ta wordo realisa cu contribucion di Comite Olimpico Arubano, dirigi pa sra. Nicole Hoevertsz cu intermediacion di Ditto Acosta.  Esaki ta e prome di un serie di seis cu ta bay construi rond Aruba, pa Santa Cruz.

Otronan lo wordo construi na Centro di Bario Ayo, Bubali, Dakota, Primavera y La Fama.

 

“Tur esaki ta parti di e trabounan cu nos ta haci pasobra ora cu a bishita e barionan a haya informacion di habitantenan di kico ta nan deseo y prioridadnan. Nos a traha riba nan peticion y a cumpli cu nan. Unda cu nos por a yuda y lo sigui yuda”, Eman a remarca.

 

P’esey e mandatario ta haci un apelacion na ciudadanonan pa mira rond den barionan y rond di Aruba rib’e trabounan cu a wordo haci.

“Si e no a yega bo bario ainda, djis tin pasenshi, meta di nos ekipo ta p’e felicidad y e cambionan aki yega den tur bario di Aruba”, Eman ta conclui.

Top