Dr. Carlos “Alex” Schwengle ta hopi orguyoso cu a scoge Aruba pa ta anfitrion di congreso di CONCACAF

Diarazon ultimo a yega un delegacion grandi di CONCACAF pa motibo cu aki na Aruba pa prome biaha lo tuma lugar e conferencia di CONCACAF.

“Nos t’asina orguyoso y bon trabou di Presidente di AVB, Richard Dijkhoff. Esaki no a cay for di shelo.

Esaki tin di haci cu cada bes AVB ta bira mas transparente, nan ta traha duro riba nan situacion financiero.

Nan ta duna bon relato financiero, tambe mihor maneho”, Minister di Salud Publico, Cuido di nos Grandinan y Deporte, dr. Carlos “Alex” Schwengle a remarca.

AVB tin un vision con nan ta bay drecha futbol aki na Aruba. Nan no ta haci esey nan so, pero nan ta haci esaki conhuntamente cu FIFA, CONCACAF y KNVB di Hulanda.

CONCACAF tin respet suficiente y nan ta mira e trabou cu ta haciendo ta bon, di cual nan a dicidi di tene e conferencia na Aruba.

“Mi ta sinti hopi honra cu nan a scoge Aruba como e pais pa haci e conferencia. Un total di 41 pais participante na un conferencia hopi importante mundial over di futbol.

Nos ta kere cu e lo bay agrega no solamente n’e imagen di Aruba, pero tambe duna un boost na mundo deportivo di futbol aki na Aruba.

Un palabra di pabien na Arubaanse Voetbal Bond hunto cu su Presidente Richard Dijkhoff cu ta haciendo un bon trabou”, asina Minister Schwengle a remarca.

Minister Schwengle ta hopi orguyoso di nan y ta spera cu esaki ta un empuhe tambe pa otro federacionnan tambe pa kisas nos por traha na mesun nivel y pusha deporte di e nivel ey pa yega n’e nivel aki. Pasobra lo bay tin diferente sorto di conferencia internacional di deporte den diferente federacion aki na Aruba.

Presidente di Arubaanse Voetbal Bond, ing. Richard Dijkhoff, ta haya cu ta un honor pa por tin e congreso aki na Aruba.

Arubaanse Voetbal Bond ta trahando basta duro riba esaki pa por a bin cun’e.

“No ta algo cu a bin di mes. E ta basa riba e reconocimento cu nos a haya como federacion di e trabounan cu nos ta haciendo na Aruba, pero reconoci dor di CONCACAF y den e caso aki tambe dor di FIFA, esaki lo bay t’e prome congreso di e Presidente y prome biaha na Aruba.

E tin un toke special pa nos tur. Mi ta kere esey ta bisa cu Aruba ta riba bon caminda”, asina ing. Richard Dijkhoff a indica.

E ta considera Presidente di CONCACAF, Victor Montagliani, como un amigo aunke cu aña pasa nan a conoce otro, e laso ta hopi estrecho y e ta un persona dedica na futbol.

Diarazon Montagliani a yega Aruba pe congreso di CONCACAF.

“Den e dianan nos dilanti mi ta kere cosnan positivo so nos lo saca afo di e congreso, pa Aruba tambe. President di FIFA tambe lo ta presente”, Dijkhoff a indica.
“Ami como Presidente di e federacion ta super orguyoso y super contento cu esaki ta sosodiendo na Aruba. Esaki ta un muestra di tur e trabounan grandi cu nos ta haci y ta un reconocimento. Y pa mi e ta algo grandi cu nos tin nan na Aruba.”

E conferencia lo ta algo grandi pa Aruba, pero tambe pa futbol en general. Esaki ta prome biaha cu algo asina grandi ta pasa na Aruba, ya cu 41 pais lo bishita e conferencia. Lo tin un participacion di alrededor di 300 persona y Aruba ta orguyoso di ta anfitrion di e conferencia aki.

Top