DVG a gana e “Silver Award” den Caribe Wave 2017

Caribe Wave 2017 tabata un ehercicio cu Departamento di Salud Publico (DVG) a participa na dje dia 21 di maart y e tabata tin di haber cu un simulacro di un supuesto tsunami den Caribe. Diferente pais di Caribe a participa y organisacionnan internacional manera UNESCO y otro departamentonan den Caribe cu tin di haber cu maneho di desaster, a organisa e ehercicio aki.

 

Hefe di Seccion di Malesanan Contagioso y coordinador di crisis di DVG, Sharline Koolman-Wever a splica cu e forma con DVG a hacie ta cu nan a forma e luga como un centro di accion y nan a actua manera e tsunami tabata rumbo pa Aruba. E forma con a haci e Caribe Wave ta cu Departamento Meteorologico a avisa cu un maremoto a tuma luga y cu consecuencia tin un tsunami cu ta yega Aruba dentro di 1 ora y 10 minuut despues di e notificacion. Basa riba esey DVG a bin cu su team di accion pa traha y nan a sinta hunto pa mira kico ta e accionnan cu lo tuma luga.

 

“E accionnan ta describi den e draaiboek y nos mester a djis train pa mira si e draaiboek tabata funciona bon”, Sharline Koolman-Wever a expresa. A tuma nota si mester a haci adaptacion of drecha algun cos. DVG a manda un raport di kico tur nan a haci dia 21 di maart ultimo. E team di accion di DVG tin un persona ta sinta cu Departamento di Calamidad pa haya tur informacion necesario y e ta bay bek cerca e team pa nan por tuma e accionnan necesario.

 

Departamento di Calamidad a informa DVG cu, como instancia, DVG a haya e “Silver Award” y na Aruba mayoria cu a participa a haya e “Bronze Award” of “Silver Award”. DVG ta contento di e logro aki. Un 2 aña pasa tambe DVG a participa y cu a bay mas rib’e parti di alarma, pero e biaha aki a traha riba mobilisa hende.

Top