E acostumbrado Peregrinacion Diabierna Santo ta tuma luga e aña aki manera custumber

Preparacionnan ya ta tuma luga pa e peregrinacion cu pa mas di 38 aña cu a saliendo for di residencia di Atan Lee riba Diabierna Santo pa 4:45 di madruga pa Kapel di Alto Vista. Manera custumber e ta un peregrinacion cu ta ser haci cu hopi debocion, inspira pa Spiritu Santo, na unda fielnan lo resa y canta. Hopi tin ta trece nan peticionnan y otronan nan gratitud.

 

No ta cuestion kende ta yaga prome, pero ta un peregrinacion hopi dedica na Señor na unda debocion y amor pa Señor y tur fielnan ta keda reflexiona.

E no ta pa condicion fisico, pero pa haci nos alma, mente y curason, mas fuerte.

Tambe pa nos por mustra Señor cuanto nos ta stim’e y cu ta sumamente agradecido pa Su sufrimento, morto cruel riba Cruz pa nos picanan. Riba tur cos pa salba nos.

 

Nos mester resa pa nos hobennan cu hopi di nan ta riba e caminda robes, pa mayornan pa nan tin e corahe pa yuda y corehi nan yiunan.

Nos mester resa pa nos propio paz, paz den nos famianan, den nos pais y den mundo.

Nos mester resa pa e aña aki cu ta aña di eleccion pa nos por keda uni y famianan no separa pa motibo di politica. Nos mester resa pa nos politiconan.

Pa nos hobennan cu ta bay haci examen. Pa Señor termina cu tur gruponan terorista cu ta azotando nos mundo.

 

Rumannan bin bisti adecuadamente, trece e misal di pueblo y un flashlight.

Ta conhuntamente nos ta haci tur e peregrinacionnan, acontecimentonan na unda nos ta mustra Señor nos gratitud y amor profundo, tumando na consideracion e amor cu E tin pa nos.

Top