E aña aki, Kiwanis Club of Aruba tin su Wine Gala Event cu e tema di the Great Gatsby dia 23 di september awor

Kiwanis Club of Aruba, representa pa Ryan Kock den su calidad di Chairman di e Fundraise Committee y Edalitza Weller, Chair Marketing, Branding & Public Relacions Kiwanis Club of Aruba – a tene su conferencia di prensa recientemente na Talk of the Town, unda a anuncia na comunidad di Aruba tocante nan evento anual, pa recauda fondo.

Ta trata di e famoso y tan spera “Wine Gala Event”, unda cu Aruba completo ta prepara p’e.

 

E aña aki Kiwanis Club of Aruba ta tene nan Wine Gala Event diasabra 23 di september, un dia después di elección, cuminsando for di 8.30pm pa 2.30am na Renaissance Conference Center, cu e tema “The Great Gatsby”.

E decoracion ta den e tema “The Great Gatsy”, unda e colornan principal cu ta uza ta oro, preto y hopi pluma.

For di yegada e invitadonan lo keda impresiona y impacta cu un espacio netamente transforma p’e elementonan decorativo, cu ta laga bo sinti den un ambiente completamente diferente.

 

Tur e fondonan cu recauda durante e evento aki, ta destina pa cubri e diferente proyectonan cu Kiwanis Club of Aruba ta ehecuta na beneficio di comunidad durante henter aña. Como ehempel por menciona algun proyecto cu ta patrocina, manera; e clubnan hubenil Key Club Colegio Arubano & Key Club San Nicolas, Action Club Sonrisa,  Builders Club y Circle K EPI n’e scolnan, pero tambe Back-to-School Project, Christmas Lunch na Imelda Hof, Smile Makers pa cuido dental pa mucha, Bon Bista p’e cuido visual pa mucha, Panda Book contra abuso sexual di e menornan, Kamishibai pa stimula contamento di storia pa mucha, Outstanding Student Awards na scol secundario, proyecto di Hisamento di Flie, Campaña di conscientisacion den trafico Don’t Text & Drive, y hopi hopi mas.

 

Carchi ta na benta p’e suma di Afl. 400 pa dos persona serca tur miembro di Kiwanis Club di Aruba of via 567-8567. Cumprando carchi pa “The Great Gatsby” Wine Gala, ademas di contribui pa un bon causa, bo lo bay goza di un anochi espectacular, unda lo tin wine stations, variacion di keshi y un cena.

Adicionalmente pa complace tur gusto, lo tin un cash bar pa otro bebida. E combinacion musical tan spera cu ta priminti di pone tremendo ambiente riba e anochi aki t’e legendario Robert & Su Solo Banda Show, banda di aña di Carnaval ‘N Fuzion, y e banda revolucion di Aruba, Buleria, y DJ Edson Tromp.

E dress code ta gala y e tema ta crea e oportunidad pa bisti cu e tokenan elegante, pa acentua e anochi di ‘The Great Gatsby’.

 

Un danki inmenso ta bay n’e wine suppliers cu e aña aki atrobe –mescos cu tur aña – ta coopera cu Kiwanis Club of Aruba cu nan biñanan esquisito.

Lo tin varios ‘door prize’ atractivo unda e main door prize lo ta un biahe pa 2 persona pa New York City.

Leave a Reply

Top