E comerciante ta esun cu lo carga esaki: KvK ta lamenta cu decision encuanto salario minimo no tabata uno transparente

Dia 9 di augustus ultimo a keda publica den diferente medio di prensa cu Ministerio di Asuntonan Social, Hubentud y Trabou, Departamento di Labor y Investigacion a anuncia cu desde 1 di augustus ultimo a ahusta e salario minimo. E decision aki ta uno cu Camara di Comercio y Industria (KvK) ta haya cuestionabel mirando cu tin diferente aspecto cu no a tene cuenta cu ne prome cu yega na un decision di e magnitud aki y riba dj’e haci un anuncio mas di un siman despues cu e ahuste lo mester drenta na vigor.

 

KvK kier mira claridad den e decision aki y ta haya falta di un base solido riba cua e ahuste aki ta basa. Un aumento di 2% di e salario minimo ta considerablemente halto, mirando cu inflacion na 2016 tabata di 0.9% y pues e aumento ta sobrepasa un posibel necesidad urgente pa hisa e salario minimo n’e momento aki. E inflacion actual no ta di e volumen cu ta rekeri un ahuste di e salario minimo den e forma cu esaki a wordo ehecuta.

 

Consecuencia di e ahuste por hiba na un situacion caminda cu e prijs di producto y servicionan tambe lo mira un aumento mirando cu e comerciante lo haye cu mas gasto cu ta resultado di hisa e salario minimo. No ta solamente e salario minimo e lo tin cu ahusta pa su empleadonan pero tambe compensacion y debernan mara na e salario manera AZV, AOV/AWW.

 

KvK ta lamenta cu no a brinda KvK e oportunidad pa discuti e topico di salario minimo y pa evalua e decision aki ni tampoco a wordo informa di antemano riba ningun detaye di e aumento di salario minimo. Di e forma aki, sector priva ta haya nan mes cu extra gastonan sin cu nan ta debidamente prepara pa esaki.

 

E momento cu a scoge pa introduci e ahuste aki tampoco tabata esun di mas apropia. E fecha di 1 di augustus 2017, cual ya a vence y no ta duna e comerciante e espacio pa ahusta nan presupuesto y p’asina por ta prepara. E comerciante awor ta haya su mes confronta cu gastonan inespera. Entre e salario minimo y e prijs di producto tin un interaccion ta existi caminda cu e salario minimo ta afecta e prijs p’e comerciante por cubri su gastonan y ainda por haci ganashi. E comerciante ta haya menos y awor su gasto ta subi tambe. Hisa e salario minimo sigur ta trece mas peso rib’e comerciante y e gastonan cu e tin cu cumpli cune p’e por haci su negoshi.

 

KvK ta dispuesto pa sinta y discuti e topico aki cu e Ministerio concerni y ta spera di por mira reaccion di parti di SER (Social Economische Raad) rib’e ahuste di salario minimo aki. Nos ta hopi consciente cu nos ta den tempo di eleccion y un cambio den nos mecanismo economico di e forma aki no ta e forma mas prudente pa gana simpatia di e votador.

Top