E intencion ta pa na october awor caba, Aruba Airlines cuminsa bula entre islanan ABC

For di algun dia caba, nos di AWEMainta tin informacion di intencion di Aruba Airlines di cuminsa bula entre e islanan ABC. Awor t’asina leu, cu e team di Aruba Airlines tabata na Corsou y Bonaire cu e meta pa anuncia cu e compania lo a cumpra of lease avionnan tipo Dash 8-300 pa bula interinsularmente.

 

Frenk Arends, kende ta un di e ehecutivonan di Aruba Airlines no kier menciona fecha, pero e deseo ta pa cuminsa duna e servicio aki na luna di october awor caba.

Algun tempo atras, Aruba Airlines a cuminsa bula pa Corsou, pero mester a stop cu e servicio aki, pasobra cu un Airbus, buelonan asina no ta rendabel.

 

Awor a dicidi pa busca avionnan manera e Dash 8-300, cu tin 50 asiento y por sirbi su meta, pa duna servicio pa Corsou y Bonaire. E intencion ta pa cuminsa bula 3 bes pa dia pa Corsou y un bes pa dia pa Bonaire, semper y cuando por bula tambe den un buelo combina.

Y manera ta di spera, Aruba Airlines lo bula cu un tarifa mucho mas economico cu loke InselAir ta cobrando pa bula interinsularmente. Cu manera ta conoci, e compania aki, pasobra nan no tin competencia, ta cobra un suma barbaro intersularmente.

 

Pero awor Aruba Airlines, dicho compania lo haya competencia sino, lo disparce for di pantaya.

 

SANTA BARBARA

Ultimo tempo, nos a bin ta tuma nota cu Aruba Airlines ta haciendo algun buelo for di Maquetia pa e.o. Miami y vice versa y tambe pa algun isla den Caribe.

Den nos combersacion cu e ehecutivo di Aruba Airlines, Frenk Arends, el a bisa cu esakinan ta buelonan charter cu Aruba Airlines ta haciendo pa Santa Barbara, cu tin varios di su avionnan 767 no disponibel.

Y den mesun rosea Frenk Arends a bisa, cu ora ta trata di buelonan charter, e pago mester ser haci up-front.

 

Bisando esaki, e ehecutivo di Aruba Airlines kier splica cu e compania di Aruba no kier pasa den e situacion manera hopi otro companianan di avion, unda Venezuela a keda debe nan masha hopi placa y no tin manera pa saca esaki.

Venezuela no debe Aruba Airlines net nada, pasobra tur nan ticketnan cu ta ser bendi na Venezuela ta na dolars, y no na bolivar.

Den proximo dianan lo nos tende mas di e buelonan interinsular, ora cu nan convoca nan conferencia di prensa pa splica di e servicio nobo, cu tanto hende ta anhela, esta di por bula entre e islanan ABC, anto na un tarifa economico pa tur hende.

Top