E pakico cu Marisol Lopez Tromp a uni cu Forza Nobo Ultimo añanan no tin transpariencia y menos ainda prioridad den gobernacion aki mas

Drs. Marisol Lopez Tromp den su introduccion, a duna di conoce pa un bes mas bay p’e reto pa nos pais. A splica pakico el a uni su mes na e Plataforma Forza Nobo,

A keda confirma cu de facto Aruba merece un di tres forza nobo den gobernacion. Ultimo añanan e por a observa hopi cos y por realisa e situacion cu Aruba t’aden. Y cu e retonan cu Aruba tin, no ta haya e transpariencia, ni e prioridad cu pueblo kier mira.

 

Tin mucho cos “fake” y maske el a papia cu varios Minister riba su preocupacionnan pa wak si por bin cambio, mehoracion den maneho manera pueblo kier, pero Marisol Lopez Tromp ta sinti cu e no a haya oido.

No por resolve esakinan cu propaganda bunita, pasobra gobernacion ta mucho mas cu esaki. P.e. e actual partido di Gobierno a bin cu un programa, pero awe por mira cu varios Minister no ta ehecuta, loke tabata prioridad pa nan.

 

Ministernan no tin prioridad pa bin Parlamento pa splica kico ta wordo haci. Pesey e ta masha contento cu POR ta trahando caba riba su programa di gobernacion, dunando participacion real.

Drs. Marisol Lopez Tromp, a bisa cu ora cu presenta un problema den comunidad, cu nos tur sa cu e ta un reto, e no por wordo resolvi como Prome Minister of Minister, dor di ta ausente. No tin ningun clase di coordinacion entre Minister y Parlamentarionan.

Bo no por resolve problema, dor di solamente pega bombiyo di luz den barionan of pone un klinker. E ta mucho mas profundo.

 

No ta tur cos por ser logra, pero bo mester tin e honestidad pa admiti y bisa riba kico ta ser traha y haci mas pa logra. Y no pretende cu tur cos ta bon, cu publicacionnan cu no ta corecto, pero ta “fake”

Mira p.e. e ley di medio ambiente, cu ta un prioridad, pero ta wordo laga un banda pa atende otro prioridad pa bay afo pa conta pajarito. Pueblo ta wak esakinan, segun Marisol Lopez Tromp.

Hopi biaha documentonan cu ta ser pidi pa oposicion, pueblo eyfo ta haya nan prome cu e representantenan di pueblo mira. Esaki no por, pasobra e ta impidi pa Parlamento haci su trabao.

 

No por t’asina cu bo no ta comparti opinion di partido di Gobierno, bo no ta bon mira mas. Forza Nobo, lo nifica masha asiento, si pueblo lo duna e confianza, pa crea e balansa desea, Bo mester tin voz y pa debati riba asunto general, loke masha dia no ta tuma lugar mas den Parlamento.

Cuanto biaha por a mira Prome Minister Mike Eman den Parlamento, masha poco. Ora tin problema, atende esakinan, pero mantene silencio, e problema ta bira mas grandi, mira p.e. otorgamento di tereno contra di ley.

 

Momento a yega cu pueblo lo wordo consulta, y bisa cu no por mas. Cu e Forza Nobo, ta bay tin representacion nobo pa cual Aruba ta cla pa tin esaki. Tur partido lo bay tene cuenta cu nan, y nan lo tin cu bay determina ta cu cua forza nobo lo bay forma e Gobiern nobo, segun drs. Marisol Lopez Tromp den su discurso di introduccion.

Un discurso cu a laga hopi recorda e Marisol Lopez Tromp, fuerte di algun aña atras.

Top