E popular canta autor Marco Borsato di bishita cerca Prome Minister Eman

E popular canta autor Hulandes Marco Borsato ta na Aruba pa un workshop di fotografia di e conocido fotografo Raymond Rutting. Nan ta na Aruba pa algo mas cu un siman riba invitacion di ATA Europa pa di e forma aki duna mas publicidad na Aruba pa atrae turista di Hulanda y demas paisnan Europeo.

 

Marco Borsato tin un vlog di su bishita na Aruba cu ta wordo bishita pa mas di dos shen mil hende. Nan ta trahando segun un schema rigido en busca di e miho shotnan.

Pa Borsato esaki ta su prome bishita na Aruba, Rutting a yega di bin varios biaha caba y a traha rib’e proyecto ‘Caranan di Aruba’ relaciona cu 30 aña di Status Aparte.

Banda di ta cantante, Borsato ta un fotografo ferviente y a haci esaki su hobby principal.

Den oranan di diamars atardi Borsato y Rutting hunto cu dos representante di ATA a haci un bishita di cortesia na Prome Minister Mike Eman.

 

E bishita a bay den un ambiente sumamente ameno. E click tabatey mesora entre Marco Borsato y Mike Eman. Nan a papia cu otro manera nan ta amigonan di hopi tempo caba. Varios tema a wordo toca. Borsato a keda encanta cu Aruba.

“Mi ta haya e Arubiano masha simpatico, hospitalario y cordial. Unda mi a pasa hende ta yama mi bon bini. Durante Lighting Parade mi tabata wordo ‘gara’ dor di hendenan pa saca potret cu nan. Tabata un aventura inolvidabel. Un ambiente diferente cu na Corsou, unda si mi a yega di bay mas biaha”, Borsato a expresa.

 

Tur dos ta envolvi den proyectonan boluntario pa yuda esnan vulnerabel den mundo.

Borsato ta President di e fundacion ‘War Child’ cu ta yuda muchanan cu a haya nan mes envolvi den guera y cu hasta na edad hopi jong a participa den e crueldanan cu guera ta trece cu ne. Rutting, kende ta un fotografo pa mas di 30 aña, tambe a conta di su proyectonan den varios pais unda el a traha den periodo di guera, yudando esnan den necesidad den cualkier forma y esnan cu ta hiba cu nan e cicatriznan cu guera a ocasiona.

 

Prome Minister Eman a conta Marco Borsato cu e tabata den e sala grandi na Hilversum ora e hoben talentoso Arubiano Vince Irie a participa den e programa Voice of Holland, unda por cierto el a yega hopi leu. Borsato mesora tabata sa ta ken, pasobra el a keda corda Vince Irie pa su carisma, su amabilidad, su convivencia, su forma di ser cu ta caracteristico pa e Arubiano cu el a topa aki.

 

Borsato y Rutting na final a haya un replica di un cas tipico di antes como gesto di aprecio di Prome Minister Eman, kende a splica nan con e casnan aki antes tabata wordo construi, teniendo cuenta cu e elementonan sin e hermentnan cu nos tin awe, pero cu conocimento y sentido comun. Borsato a bisa cu esaki ta su prome biaha na Aruba, pero cu ta bin bek.

Top