E prijs cu tin cu paga haya libertad, pero grupo di Venezolano, dos deteni y uno a hoga, pero riba dje kier importa arma y droga

Ayera mainta pa 07.55 informacion a drenta via Central di Polis cu den Parke Nacional  Arikok tin un aanlanding a tuma lugar.

Por ta nan a kere cu como Polis tin masha trabao ayera, a haci intento di subi tera ilegalmente, pero net ayera laman tabata mas malo, bruto cu nunca.

 

Mesora a manda patruya policial di Santa Cruz y a dirigi su mes di biaha na altura di Boca Druif a bin haya dos persona masculino di nacionalidad Venezolano.

Mester a pidi asistencia di Cuerpo di Bombero, pasobra a bin resulta cu un di e Venezolanonan aki tabata malpega bao di baranca. Mester a pidi asistencia tambe di Guardacosta, pa manda un helicopter pa transporta un di nan cu ta malamente herida.

Den den becindario a bin haya tambe 2 revolver, 1 shotgun y 1 bulto cu un cantidad desconoci di marihuana.  E dos hende nacionalidad Venezolano a wordo deteni.

 

N’e momento aki tambe un señora a bati alarma, pasobra el a bin haya un curpa sin bida di un hende homber na altura di Fuente, cu ta keda banda di Boca Prins. Segun nos fuente, no ta exclui cu lo por tin mas hende morto, maske te cu ayera a haya solamente un persona.

Maske cu Polis tin man yen cu entrega di lista, esnan responsabel, esta e Unidad di Crimen Organisa lo sigui cu e investigacion.

 

Cu yudanza di e Kustwachthelikopter a hiba e heridonan pa Aeropuerto, unda ambulance a transporta nan despues pa Hospital.

Mientras e curpa haya sin bida, a ser tuma den beslag pa Ministerio Publico.

Leave a Reply

Top