E prome Concierto Dominical Donny Lacle dia 29 di januari 2017: A cera aña cu un dushi ambiente cu hopi talento

 

 

 

E prome Concierto Dominical Donny Laclé di e aña aki atrobe tabatin un ambiente masha alegre. Un audiencia masha anima a gosa di hopi talento musical Arubiano.

24 Studiante di IPA Derde Jaar, bou guia de Mayra Kock-Garrido y Rosemarie Provence a canta y/o toca cuarta y asina a duna un bunita presentacion cu e. o. algun cantica di mucha, manera Canta un cancion, Maria ta den cushina, Trip den stad, Orjunchi y algun mas.

Melixa Werleman, alumna di canto di Mayra Kock-Garrido na november aña pasa, a haya un scholarship di Fundacion Donny Laclé pa Hoben Talento Musical, pa sigui cu su lesnan di canto y participacion den coro.

 

Y e aña tambe pa sigui les pa siña lesa musica. Melixa a laga esnan presente disfruta di e cantica “The Turtle Dove”, compaña pa Edwin Kock riba guitara y “Can’t help falling in love” compaña pa Mayra riba piano y a demostra cu e tin un futuro musical prometedor su dilanti.

Mientras e siguiente musiconan tabata prepara, e caha di glas a pasa rond, unda un y tur por a deposita un donacion pa nos por sigui yuda nos hobennan artistico cu un tipo di scholarship pa nan estudio musical.

 

Siguientemente algun alumno di Scol di Musica Rufo Wever a haya e oportunidad pa demostra nan talentonan musical.

Prome nos a scucha Ivan Ponson, kende a duna un bunita interpretacion riba piano di e piesa Aragonaise di Jules Massenet.

Despues e duo Justin Peña y Luis van Delden riba respectivamente guitara clasico y cuarta a laga e publico gosa di e cantica Nelly di Antonio Laura.

Como cu un pianista a cay afo, nos a haya Jonathan Ortega dispuesto unbes pa yena e lugar aki. Despues di a keda mas cu un aña sin toca piano, pa motibonan medico, algun tempo pasa Jonathan a sinta tras di piano atrobe y diadomingo el a haci un cos.

Tur presente a keda encanta despues di a scucha e tres piesanan: Vivian, Biblioteca Nacional y Umberto Croes di Padú Lampe. Nan a hasta pidi pa mas.

 

Jean Claude Richardson, compaña pa su maestro Serghio Jansen a duna un bunita presentacion riba nan guitara electrico di Ronda Alla Turca di Mozart

Finalmente nos a disfruta di musica di steelband. Tropical Vibes, bou direccion di Ronny Laclé, cu Ricky Figaroa riba baho, a sa di pone e bishitantenan “subi pista di baile” tocando tanto musica di Carnaval como musica crioyo. Y a crea un dushi ambiente.

 

Finalmente nos kier yama danki na tur e artistanan cu a presenta, tambe na Ray y su crew cu a percura p’e garganta y e stoma, n’e soundman Angelo Koolman y na Manchebo cu a pone su sistema di sonido na nos disposicion.

Como cu 26 di februari tin Parada Grandi di Carnaval, e siguiente concierto lo tuma lugar dia 26 di maart 2017. Keda pendiente.

Top