E siman aki a inicia conferencia PAMAC di Florida-Caribbean Cruise Association

Manera ya ta conoci, e siman aki nos isla lo ta anfitrion di un grupo masha importante di ehecutivonan di e sector di turismo crucero. Un total di 83 miembro platinum di FCCA, 11 empleado di FCCA y 47 invitado ta na Aruba actualmente p’e conferencia.

E Platinum Associate Member Advisory Council Conference (PAMAC) di Florida-Caribbean Cruise Association (FCCA) ta un evento cu Aruba Tourism Authority ta wak como un oportunidad excelente pa ilustra e avancenan cu Aruba a conoce.

Hunto cu socionan local, A.T.A. a prepara un programa caminda lo brinda e participantenan di e conferencia e experiencia cu Aruba por ofrece como destino turistico na pasaheronan crucero.

 

Adicional na sesionnan di trabou cu stakeholders local y presentacionnan di parti di A.T.A. y A.P.A., e participantenan di e conferencia ta wordo ofreci pa conoce nos isla y su encantonan na diferente manera.

Tambe Aruba mas cu claro ta tuma e oportunidad pa reuni cu e ‘Security and Operations Committee’ di FCCA, cu ta consisti di ‘decision makers’ clave pa cu turismo crucero.

E sesion cu e comision a tuma lugar diaranson mainta.

 

Fuera di presentacionnan oficial parti mainta, a brinda un tour di e facilidad di puerto, di Caya G.F. Betico Croes y becindario, na unda a haci uzo di e tram tambe.

Durante nan walking tour, e delegacion a ricibi un caluroso bon-bini di Prome Minister Mike Eman, Minister ing. Mike de Meza encarga cu maneho di Turismo, Transporte, Energia y Medio Ambiente y Minister di Economia y Comunicacion Richard Arends.

 

Participantenan general, miembro Platinum di FCCA, ta wordo ofreci diferente sailing trip, oportunidad pa conoce nos gastronomia, participa den un tour den Parke Arikok, San Nicolas y Mangel Halto na unda nan por disfruta di nos playanan bunita.

Durante e reunion cu e ‘Security and Operations Committee’ a presenta diferente informacion. Aruba ta un destinacion masha gusta pa turismo crucero y un di e islanan mihor bishita.

Compara cu e prome 5 luna di 2016, turismo crucero pa 2017 a aumenta cu 12. 8%. Esey ta un total di 45.015 bishitante mas cu e mesun temporada di aña pasa.

 

Durante un estudio haci na 2016 dor di A.T.A. diferente aspecto ta destaca; ora a puntra e turistanan crucero con nan ta haya e cordialidad di nos localnan, 94% a responde cu nan ta satisfecho/hopi satisfecho cu esey.

Ademas, 66% di e turistanan crucero a indica cu nan a scoge nan linea di crucero, pasobra Aruba tabata riba e itinerario.

Nos cordialidad, seguridad y nos playanan ta keda e tres factornan mas importante p’e bishitante.

 

Tambe por mira claramente e importancia pa un destinacion di sigui desaroya su mes, pa sigui atrae e industria di turismo, stay-over y crucero. Por ehempel e embeyecimento di Oranjestad y Paardenbaai Plaza, e boothnan cu ta percura p’e turistanan por haya/pidi informacion di nos isla, e manera cu e borchinan ta indica unda e turista por bay (signage), renobacion di nos faro na Arashi, y naturalmente embeyecimento di nos playanan, tur a wordo subraya como desaroyonan importante p’asina continuamente sigui enrikese e experiencia di e bishitante.

Tur esaki ta haci nos destinacion uno mas atractivo, como tambe e turismo lo por laga mas atras den nos economia.

 

Durante di e reunion cu e ‘Security and Operations Committee’ a ilustra tambe cu e estudio di BREA (Business Economice Research Advisors) conduci na 2015 ta mustra cu e turista crucero ta gasta un promedio di US$ 112.10 pa persona durante nan bishita na Aruba.

Esaki ta 17.5% di crecemento compara cu e estudio previo di aña 2012.

Pa cu e evento actual: PAMAC ta un evento cu FCCA ta coordina pa su miembronan platinum y pa liñanan crucero keda na ‘forefront’ di informacion riba tanto e industria y su miembronan, como tambe destinacionnan, mientras cu ta haya maneranan pa maximalisa e beneficionan pa tur.

FCCA ta un organisacion comercial no lucrativo cu ta consisti di 19 miembro di liñanan crucero operando riba mas cu 100 barco den e awanan di laman di Florida, Caribe y Latino America.

 

 

Leave a Reply

Top