E storia di e 90 cuadra scibi pa Rosanna Koelewijn-Tromp

Parti di un proyecto di DOW pa decora e interior di e edificio- y casnan di Centro di Cuido pa nos Grandinan na San Nicolas, tabata esun di embeyece e murayanan di e compleho bunita aki cu cuadra.

Iris Giel, Project Manager di Departamento di Ontwerp y Planning di DOW tabatin e proyecto aki na su encargo. Iris a bin cu e idea, pa mas tanto grupo di pinta, mucha- y hobennan, hende grandi y persona special wordo envolvi den e proyecto di pinta.

 

Rosanna Koelewijn-Tromp a haya e tarea di sra. Iris Giel di DOW, pa ehecuta e proyecto aki. Bou Rosanna su guia, na augustus 2011 e proyecto di e cuadra pa Centro di Cuido pa nos Grandinan na San Nicolas a wordo inicia.

Pa 2013 el a percura pa tur e cuadranan a keda colga den e centro aki. Un total di 90 cuadra, pinta dor di 11 grupo di pinta y dor di 107 pintor local.

E tema tabata Aruba, su cultura, fauna, flor, paisahe y hopi mas. Un joya di un coleccion.

 

Despues cu e proyecto di 90 cuadra a keda cla, Rosanna Koelewijn-Tromp a haya ta necesario, pa documenta e bunita storia di e 90 cuadra aki den un buki, p’asina e storia aki no bay perdi y pa tur hende sa di e bunita coleccion aki na Centro di Cuido y pa por bay wak e.

E gruponan cu a participa tabata: 1.    A. Doornkamp Art Academy, bou guia di Alfredo Doornkamp; 2. Scol di Arte Alma Liber, bou guia di Angiolina Henriquez; 3. F.D.E.C., bou guia di King Lie Kwie; 4. KinderAtelier, bou guia di Miriam de L’Isle; 5.  F.A.A., bou guia di Melisa Richardson; 6. C.E.D.E.S., bou guia di Martha Echeverry; 7. Centro di Bario Playa Pabao, bou guia di Rudolf Dijkhoff; 8. Stichting Man na Obra, bou guia di Marlene van Blarcum; 9. Waldy Simson Art School, bou guia di Waldy Simson; 10. Stichting MIRA, bou guia di Jean Vieira; 11. Atelier La Bonne Vie, bou guia di Rosanna Koelewijn-Tromp.

 

Iris y Rosanna ta invita tur hende pa pasa wak e coleccion aki y alabez duna nos grandinan un bishita na Centro di Cuido na Palisiaweg.

E buki lo wordo parti gratis pa skolnan. E lo ta na benta na DeWit VanDorp Stores.

Un gradicimento grandi ta bay na tur hende cu a yuda haci e buki posibel en especial e sponsornan esta: UNOCA, SABA, Pro-Graphics y Aruba Bank.

Riba e foto adhunto por mira entrega di e buki dor di Rosanna Koelewijn-Tromp na Unoca, na Directora saliente sra. Nataly Harms y Directora nobo sra. Hernandez.

Leave a Reply

Top