ECO DMS a tene un fiesta di aprecio di tres dia

Na honor di su di 30 aniversario cu lo tuma lugar na november, ECO DMS a organisa un cantidad di evento durante e aña aki, celebrando su asociadonan fiel, e companianan cu cual e ta haci negoshi y e comunidad di e isla en general.

E celebracionnan ta tuma lugar tur luna rond di dia 30, y pa januari, februari, maart y april, esakinan a haya un nificacion special, unda cu ECO DMS a organisa actividadnan caritativo y cultural p’e comunidad.

 

Na mei, a toca turno n’e companianan cu ta haci negoshi cu ECO DMS, y e compania no a spar cualkier gasto pa mustra nan gratitud y aprecio.

Pa nan por a dedica tempo personalisa cu cada un di e companianan cu cual nan ta haci negoshi, e invitadonan a wordo separa den tres grupo, y ricibi den transcurso di tres anochi consecutivo, cuminsando cu e restaurant y companianan di entretenimento cu ta provee ekipo di AV y luz. Companianan di huur y tiendanan di flor tambe a forma parti di e grupo aki.

 

E siguiente anochi e specialistanan di transportacion, esta e chauffeurnan di taxi, e companianan di deporte acuatico y operadornan di actividad a ricibi malcriamento special, y riba e di tres anochi, ehecutivo y gerentenan di hotel, miembronan di e Aruba Tourism Authority, e Aruba Hotel and Tourism Association, e ekipo di Aeropuerto y e banconan, a wordo ricibi y entreteni den gran estilo.

 

E fiesta, un evento dinamico, a cuminsa na Azia lounge na Palm Beach, unda tur hende a wordo pidi pa parkeer y laga nan vehiculo atras; y despues di un bebida di bon bini, e fiesta a muda pa 4 diferente sitio, unda cu, ademas di tremendo cuminda y biña, nan a comparti di ideanan y a intercambia di gradicimentonan.

 

ECO DMS lo ta celebrando e culminacion di su fiesta di aniversario di un aña largo riba dia 13 di december, 2017.

 

Leave a Reply

Top