Eddy Ras (E Forsa Nobo): Entre 41 pa 45 % di alumnonan cu ta biba na Savaneta ta bay un scol basico den otro region

Eddy Ras di POR ta bisa cu den un comunicado anterior el a trece dilanti cu region di Savaneta ta den un situacion similar cu region di Paradera. E situacion ta haci cu ambos region tin demanda pa un scol basico mas.

Na Savaneta tin un averahe di 250 luga di menos na scolnan basico compara cu e averahe di e cantidad di alumnonan cu ta bay un scol basico procedente di region Savaneta.

Na Savaneta tin dos scol basico cu ta Sagrado Curason y Colegio Santa Fatima. Tur dos scol conhuntamente tin un averahe di luga pa 750 alumno.

Den e ultimo añanan escolar tin un averahe di 1000 alumno procedente di region Savaneta cu ta bay un scol basico.

 

Segun Ras, base di cifranan di rapportnan di enseñansa cu por a wordo acumula a bin dilanti, cu un gran parti di alumnonan di region di Savaneta ta bay un scol basico den otro region.

Pa medio di e cifranan menciona ta visualisa cu, entre 41 pa 45 % di alumnonan cu ta bay un scol basico procedente di region Savaneta, ta acudi un scol basico den un otro region.

Dor di a compara e situacion menciona di region Savaneta cu otro regionnan (cu excepcion di region di Paradera) e resultado ta lo siguiente:

Na regionnan Noord / Tanki Leendert, Oranjestad y Santa Cruz tin un averahe di 72 pa 76 % di alumnonan cu ta bay un scol basico den nan mesun region.

Na region di San Nicolas tin un averahe di 90 % di alumnonan cu ta bay un scol basico den nan mes un region.

 

Dor cu e scolnan basico di region Savaneta tin menos luga compara cu e cantidad di alumno cu ta bay un scol basico procedente di region Savaneta, y cu e porcentahe di alumnonan cu ta acudi un scol basico den un otro region, ta haci cu region di Savaneta mester di un scol basico mas. Banda di un scol basico mas mester tene cuenta cu localidad di e scol. Esaki ta un punto cu sigur lo wordo traha mas amplio riba dj’e, Eddy Ras a duna di conoce.

Top