Edgard Vrolijk di MEP: Entrante 1 februari 2017 e functiehuis pa cuerpo di maestro lo drenta na vigor

Recientemente por a tuma nota di un comunicado den prensa di parti Simar, unda cu ta anuncia cu entrante 1 februari 2017 e functiehuis pa cuerpo di maestro lo drenta na vigor (cu ainda mester ser trata den Staten).

Esaki ta algo hopi importante pa por tin un descripcion di nan funcionamento como maestro, unda cada un por sa ki ta spera di nan y sigur tambe ta brinda nan e oportunidad di por sigui crece, pasobra antes cada docente tabata ser mara na edad y te cu un maximo di 38 aña, segun Edgard Vrolijk di MEP

 

Un preocupacion cu sigur ta biba den esnan cu di aña 2000 ta warda riba e restructuracion di salario y mientras cu nan añanan den enseñansa tambe ta avansa. Hopi di e maestronan aki ya falta poco pa bay cu pensioen y otronan cu mientras ya tin 10 of mas aña sin conoce un aumento. Pero cu e declaracion di parti Simar den restructuracion aki cu nan no lo conoce aumento, e grupo aki ta sinti mes nan un biaha mas perhudica.

 

DICON PERHUDICA?

Un parti grandi di e grupo aki a hera no un, pero dos biaha e boto di pensioen debi na prome e aumento pa 60 aña y ultimo e aumento pa 65 aña.

Y no solamente e aumento di edad ta perhudica e grupo aki cu tin hopi aña den enseñansa, pero tambe e areglo nobo di pensioen basa riba e middelloonregeling cu na final di dia nan lo bin cu menos entrada ora di baha cu pensioen.

Y cu e implementacion aki di e functiehuis e grupo aki lo por crece, pero no manera esnan mas hoben den enseñansa cu por yega un maximo di 25 trede, mientras hopi di e grupo aki lo conoce un minimo di trede prome cu nan bay cu pensioen, segun Edgard Vrolijk.

 

Naturalmente e grupo aki cu hopi aña den enseñansa ta sinti cu nan añanan dedica na nos hubentud sigur den e sistema aki lo ta benta afo.

Lo husto ta pa duna e grupo cu ya ta riba 38 aña e tredenan equivalente na locual nan por a cana caba y cu nan salario lo por ser ahusta na un manera husto.

Un otro grupo ta sinti cu tin descripcionnan di cierto funcion no identifica na nan funcionamento. Un ehempel t’e grupo di adjunctleiders/sters cu no ta ambulante y cu ta maestro active, pero tin di carga dos responsabilidad y asina tin mas ehempel.

 

Otro preocupacion sigur lo ta evaluacion di maestronan. Esaki naturalmente ta basa riba e descripcion di nan trabao, pero pa nan ta keda ainda con obhetivo esaki lo por ta.

Enberdad tin un comision di apelacion (bezwaarcommissie) pero ki seguridad esaki por brinda e maestro no ta un garantia.

 

CAMPAÑA DI INFORMACION

Y asina tin hopi mas pregunta, p’esey Edgard Vrolijk ta kere cu ta na su lugar pa bin un campaña completo di parti Gobierno y sigur di sindicato di maestronan Simar, SEPPA cu tambe ta parti di esaki pa nan informa, pero mas ainda brinda e cuerpo di maestro e oportunidad pa trece nan pregunta y puntonan di preocupacion dilanti y asina nan por haya mihor informacion y sigur contesta di esnan cu tabata encarga cu esaki y cu lo sa mihor.

 

Pa termina si Edgard Vrolijk ta bisa cu esaki ta algo positivo den e carera di e cuerpo di docente, unda cu nan  por sigui crece a base di nan prestacion y sigur den futuro cercano hopi cos positivo ta spera e cuerpo di docente, pero enseñansa en general na Aruba cu lo mester ta prioridad number uno si nos kier salba nos hobennan.

Top