Edificio di ex-DOOV na San Nicolas tambe a wordo renoba

Ultimo tempo nos por a tuma nota di diferente edificio na San Nicolas cu a wordo renoba of cu ta den e proceso pa wordo renoba.

E bista mahos cu diferente edificio tabata duna pa loke ta toca e entrada di B. van der Veen Zeppenfeldtstraat, poco poco no t’ey mas.

Edificionan manera Nicolaas Store, ex Uncle Louis Store, ex SINFA, Watertoren e.o. a wordo drecha y a traha riba e aspecto di embeyecemento.

 

Segun Lorna C. Jansen-Varlack, e edificio di ex-DOOV mihor conoci como e edificio cu glas blauw, tabata den un estado grandi di deterioracion pa hopi aña.

Hopi di e bentananan grandi di glas a wordo destrui y e lugar a sufri hopi daño di vandalismo. E edificio aki tambe ta den e proceso di renobacion y den preparacion pa diferente oficina wordo ubica eyden.

Algun oficina di Gobierno lo muda pariba y tambe e oficina di Aruba Oil Refinery lo establece su mes eyden.

 

E murayanan a haya e tratamento necesario y a percura di drecha tur cos cu tabata mester di mantencion.

E renobacion ta casi cla y dentro di algun siman  e portanan di e edificio aki lo keda habri oficialmente.

E establecimento di oficinanan den Caya Principal di S.N. sigur lo trece mas movecion den e area y lo contribui n’e economia di pariba di brug.

 

Asina nos por mira cu e bista mahos di edificionan bandona y destrui ta cuminsa disparce den e area di compra na San Nicolas. Comunidad tambe tin un responsabilidad pa cu cuido di e edificionan y pa señala autoridad ora mira cu cierto destruccion ta tuma lugar.

Nos ta keda den espera di un limpiesa total den e area aki pa futuro pa loke ta toca e areanan unda yerba a cuminsa crece bek y unda hopi desperdicio a acumula, segun e miembro di Parlamento di AVP, sra. Lorna C. Jansen-Varlack.

 

Top