El a cay na Venezuela: Jorge Jamaloodin t’aden!!

WILLEMSTAD – E èx Minister di Finansa den Gabinete Schotte, Jorge Jamaloodin y miembro prominente di partido MFK di Gerrit Schotte, kende ta fugitivo mas cu un aña caba scondiendo na Venezuela a keda capture siman pasa pa agentenan di SEBIM na Venezuela.
No tin confirmacion oficial ta na unda y den cua ciudad Venezolano a arestá Jamaloodin riba peticion di husticia di Corsou pasobra durante hopi tempo el a biba na Nueva Esparta riba e isla Margarita, pero tin version cu ta na Valencia agentenan di SEBIM a aresté.
E detencion di Jorge Jamaloodin a tuma lugar respondiendo riba un peticion cu Corsou a haci basta tempo caba na autoridadnan Venezolano, kendenan a haña ta bon pa awor numa arestá e fugitivo kende reportadamente ta malo.
Reportadamente e tabata den compania di su compañera di bida, pero no a arestá esaki, pasobra no tin cargo contra dje.
Apesar cu Reino Hulandes no tin tratado di extradicion cu Venezuela, esaki no a impedi cu autoridadnan Venezolano a haci caso di e peticion y awor tin cu spera riba e tramitenan protocolar cu ta conta internacionalmente promé cu e entrega na Corsou por tuma lugar corectamente.
Pa regla e fugitivo tin derecho di apelá e orden di extradicion den Corte na Venezuela y esey sí por bira un problema, pasobra na Venezuela no tin estado di derecho cu ta garantisá cualkier persona cu hiba su caso Corte, cu nan lo trata e caso denter di un tempo rasonabel.
Of Venezuela por haci manera ta sosodé diariamente, nan ta pone regla un banda y pone Jamaloodin bordo di un avion y aterisé na Hato.
Pero por lo pronto cualkier noticia riba e asunto ta speculacion y ta dependé cu si Jamaloodin mes si e kier apelá su extradicion den cual caso e proceso por dura basta.

Di acuerdo cu vocero di Ministerio Publico na Corsou, a pidi extradicion di Jamaloodin pa interogé riba su supuesto conexion den e caso Bientu den cual a condená e conocido rifero Robby dos Santos na dos aña di prizon condicional pa pocesion ilegal di arma, labamento di placa, falsificacion di documento di belasting, falsificacion di documentonan comercial y di ta forma parti di un organisacion criminal.

Corte a absolvé di e cargo di bende number falsificá. Jamaloodin ta ruman di Robby y Amparo dos Santos di parti di mama. Ministerio Publico kier tende Jamaloodin alias J.J. (sic!!) den otro caso cu yama Germanium cu y di cual casi ningun hende sa di dje.
Y naturalmente Ministerio Publico kier tin un combersashon amabel cune riba su relacion cu e intermediarionan cu a cobra pa tira Helmien Wiels mata.
P’esey e ta sospechoso den e caso Maximus.
E caso di Germanium aparentemente tin di haber cu traspaso di un cas den cual a usa documentonan falsificá.
E otro kaso, Biento, ta será y Robby dos Santos no a apelá y por ehecutá e sentencia. Loke ta pasa ta cu a keda algun cos cu Ministerio Publico no tabata cla cune y kier investigá algun aspecto mas di e caso aki. Ta p’esey tambe a pidi su extradicion.

Leave a Reply

Top