Eleccionnan pa posicionnan den SEPPA y mester di un lider nobo

Otro luna ta haci 3 aña cu tabatin eleccionnan p’e diferente funcionnan den SEPPA.

Pues april 2017 ta luna di elección den SEPPA.

Según e ex líder sindical, Gregorio Wolff, tin un silencio “mahos” riba e asunto aki.  Pakico mahos? Pasobra elección t’e parti mas importante den un democracia.

Y den sindicato democracia tambe ta bin na prome lugar, e silencio ta aparenta cu esaki no ta e caso.

 

Den democracia, información y formación ta hopi importante, miembronan ta carece di información riba e asunto aki.

E información cu tur miembro mester ricibi ta kendenan actualmente ta forma parti di e comité ehecutivo, kendenan tin e maneho den SEPPA y kendenan ta miembronan di directiva, cual t’e órgano pa controla e maneho den SEPPA.

Puntra cualkier miembro, e no sa. Alabes ya mester a sali un yamada caba na tur miembro, puntrando kendenan kier pone nan mes disponibel pa ta dirigente, según Gregorio Wolff.

 

STRUCTURA DI SEPPA

Te final di 2010, SEPPA tabatin un structura, unda cu un directiva tabata encarga cu e maneho y alabes cu control, e Director tabata e Presidente.

Na 2010, después di discusión di como 10 aña den congreso y otro organonan di SEPPA, a cambia e statutonan di SEPPA, unda e structura pa dirigi SEPPA a cambia.

Awor un comité ehecutivo pa dirigi e sindicato y e líder máximo t’e Secretario General.

A bin un órgano pa controla e comité ehecutivo y tambe haci otro controlnan.

 

E Directiva tin un Presidente cu su único autoridad di maneho ta pa dirigi reunionnan di directiva y congresonan. Pues e función di Presidente, cu tur su tareanan di prome cu 2011 a pasa p’e Secretario General.

Pues e función di líder maximo di SEPPA a keda igual, solamente a bin un cambio den e nomber, e Presidente a bira Secretario General.

Den e statutonan bieu di prome cu 2011, den un articulo ta para cu e líder máximo di SEPPA of Presidente ta keda 10 aña y congreso por dicidi pa solamente un biaha, pa alarga e periodo aki cu 2 aña mas. Pues maximalmente 12 aña e líder máximo por keda.

Den e statutonan nobo ta para cu e líder máximo por ser re-eligi 3 biaha, cada biaha pa 3 aña.

 

Sra. Magaly Brito no por ta candidato mas p’e posición di líder máximo den SEPPA, según Gregorio Wolff.

For di final di maart 2000, sra. Magaly Brito ta funcionando como e líder máximo den SEPPA.

Pues 17 aña caba y si e ta candidato atrobe y wordo eligi lo e keda 20 aña como líder máximo.

Den e temponan aki cu nos ta yama moderno, bo ta haya esaki solamente den organisacionnan sindical hopi autoritario, cu un tendencia dictatorial, unda e poder ta keda cerca un persona y democracia ta ser degrada pa cumpli cu reglanan di e organización, pero defacto t’e líder ta dicidi, pues unda e líder ta ser yama dictador.

Gregorio Wolff ta di opinión cu ningún miembro kier esaki pa SEPPA.

 

Otro caracteristicanan ora un líder pasa 10 pa 12 aña como líder di un organización ta cu e persona, den mayoría di caso ta tuma como normal actitudnan autoritario y negativo, cualnan no ta bon ni p’e organización, ni p’e persona mes.

Tur caminda di mundo bo ta scucha cu e forma realistico, pa lidernan eherce nan trabao ta mara na periodonan.

1.Ora bo tuma un función nobo, como persona entusiasto pa eherce e función e prome añanan (3 pa 5), bo ta haci lo máximo pa siña e trabao (periodo di aprentice). On the job y cu otro formacionnan pa ta prepara bo mes pa eherce e función den e mihor forma.

  1. Despues tin e periodo (+ 5aña) cu tur dinamismo bo ta duna lo máximo n’e organización, pa haci e trabao corectamente.
  2. Despues di 10 aña ta bin e periodo di “Free Wheel”, esta awor como experto bo ta tuma tur cos mas suave y poco a poco e dinamismo ta cayendo, ya cu preparación no ta necesario mas y ta aparece e fenómeno cu yama flohera.

Tambe ta bisto cu papiamento sin fin y sin bisa mucho cos, ta haci su entrada. Igualmente e mentalidad pa maniobra, pa manipula , pa dicta ta drentando mas y mas.

Mas largo e periodo aki, menciona bao di 3, dura, mas atrás e organización ta bay y igualmente e persona envolví, maske e mes no ta conciente di esaki.

Mester menciona si cu aplicación di e 3 puntonan no ta semper aplicabel, Semper lo bo topa cu casonan excepcional.
Preparación ni formación no t’ey pa trece cambio den liderazgo y ta sigui perde miembro.

Por surgi un problema awor, ya cu no tabatin preparacionnan, e.o. formación pa lidernan nobo y sigur p’e función di Secretario General.

Pero con cu wak e, un líder nobo ta hopi mihor cu un líder cu ya tin 17 aña den e función.

Esaki sigur si considera cu un persona cu mas di 12 aña como líder sindical ya no tin e dinamismo mas, su flohera ta aumentando cada dia mas y mas, igualmente e mentalidad pa maniobra, pa manipula, pa ta autoritario y hasta dicta.

 

Pues den tur sentido un líder nobo pa SEPPA t’e mihor solución, según Gregorio Wolff.

Tambe si nos considera cuanto departamento y companianan SEPPA ta perdiendo ultimo añanan, manera IMSAM, Arubus N.V., SABA, SVb, Directie Luchtvaart, KIA, Serlimar N.V. y asina tin hopi mas pa menciona.

Despues di 17 aña, miembronan ta cansa di e mesun líder. Pues un cambio ta na su lugar.

 

SEPPA, un sindicato grandi cu un bunita historia di lucha y logronan na fabor di trahador.

Como miembro di SEPPA y persona cu a dirigi SEPPA pa varios aña den pasado, Gregorio Wolff ta sinti’e obliga pa saca e comunicado aki pa pone miembro y delegadonan na altura di e situación den nos sindicato grandi, cual ultimo tempo a ricibi hopi sla pa falta di bon maneho.

SEPPA ta un sindicato grandi cu e mihor infrastructura sindical na Aruba, un historia sindical bunita cu hopi lucha y logronan p’e trahador, cu su propio sede sindical cu un sala di Congreso, cu su cooperativa, CAPA, unda miembronan por spaar recibiendo interesnan como 3 biaha mas halto cu banconan local y cu e posibilidad pa haci préstamo.

Tambe SEPPA tin diferente areglo pa su miembrecia. Asina tin hopi mas issue y asuntonan cu bo ta haya como miembro di SEPPA. E cambio ta pa hiba SEPPA dilanti.

 

Miembronan lanta para y hiba un discusión sano. Un discusión sano y reaccionnan di miembronan di SEPPA riba e próximo elección den discusionnan of den prensa ta na su lugar. E mester keda tambe un asunto di SEPPA su miembronan.

Otro berdad ta cu hopi miembro awe ta exigi e cambio den liderazgo di SEPPA.

Pero mas cu tur, e democracia den SEPPA mester prevalece, pero pesey tur miembro y tur delegado mester ta conciente di e situación reinante den SEPPA y hiba e discusion cu otro miembronan, según Gregorio Wolff.

Top