Elenco di presentadonan di television ta uni forsa pa Padu

Durante e siguiente dianan lo enfoca mas riba celebracion di nos Dia Nacional, specialmente tambe pa inauguracion di Plaza Padu.

P’e ocasion aki lo pone extra atencion na Padu del Caribe, di 96 aña di edad. Nos Padu stima no solamente ta un plaza na su nomber, pero tambe un estatua hunto cu su amigonan Rufo Wever y Lio Booi, como co-compositornan di nos Himno Nacional.

Gobierno ta organisando un evento magno y p’esey a invita personalidadnan di television pa hunto carga e celebracion di e aña aki.

 

Prome Minister Mike Eman a lansa e idea cu p’e evento special aki y adelantando e celebracion, pa uni un elenco di presentadonan di television pa prepara relatonan relaciona cu e celebracion special y na mes momento pa carga e evento diabierna dia 17 di maart.

Cua mihor elenco p’e evento aki cu esnan cu a start cu ATV exactamente 21 aña pasa.

Den sala di reunion di Conseho di Minister, e prome mandatario a invita personahenan manera Jacqueline Suttle, Ruben Trapenberg, Cherryldine Buckley, Giovanni Muller, Patrick Paskel, Tessa Pietersz, Tom Pietersz y Ruben Garcia.

Pa por garantisa un produccion spectacular, a invita un di e prome productornan di ATV, tempo di su inicio, esta Kelly Burke di Merca.

El a acepta mesora pa produci e storianan y e evento si ta necesario, hunto cu Jado Maduro di Pro Video y Aldrich Croes di ECA.

 

E caranan aki tur ta di tempo cu a funda ATV na 1996 y cu hopi placer a uni pa hunto produci un evento tur afo, n’e nivel halto cu semper comunidad a custumbra di dje di ATV.

Prome Minister Mike Eman a gradici tur pa nan disponibilidad y di a acepta e reto aki na honor di e Tata di nos Cultura, Juan Chabaya ‘Padu’ Lampe.

 

Top