Emsley Tromp na Minister Richard Gibson: “Nos lo topa den Corte”

PHILIPSBURG – Más cu dos decenia y mei cu e tin ta funcioná como Presidente di Banco Central sin cu nunca a cuestioná si e ta confiabel pa ocupá e funshon, ‘out of the f… blue sky’, Minister Richard Gibson a bin cay riba e idea glorioso pa laga servicio di inteligencia di e isla mas corupto y mal administrá di Reino haci un screening riba Emsley Tromp.

Naturalmente e paso aki tin di haber cu otro susesonan cu a tuma lugar specialmente durante e periodo cu èx Minister di Finansa José Jardim tabata colega di Gibson caminda tin sospecho cu nan a intercambiá ‘fabor di estado’ cu otro pa regla un ke otro.

 

Gibson lo a pensa primitivamente cu ta ora otronan ta busca pa acoralá un funcionario halto su gòlpinan lo ta mas efectivo, pero den e caso aki el a cometé un eror di evaluacion garafal.

El a lubidá cu e persona cu el a scoge como adversario pa satisfacé podernan aheno y ultramar, ta mucho mas versá cune den e tipo di peleanan di nivel inteligente.

Via di su abogado dr. Tromp a refuta e sospechonan di Ministerio Publico na Corsou, pasobra ta basá riba e hecho cu a califiké como sospechoso di a cometé fraude fiscal, servicio di inteligencia no a duné un decision positivo den e screening.

 

Via su abogado dr. Tromp a informá cu e lo apelá e decision di Gobierno di Sint Maarten pa nenga di duné e certificado di buena pro pe funcioná como Presidente di Banco Central di Corsou y Sint Maarten pa loke ta toca e parti di Sint Maarten.

Ta insólito pa despues cu el a okupá e puesto aki decenas di aña pa bin ku declaracion asina.

Por lo tanto dr. Tromp a splica cu e no por reconocé su mes den decision di Minister Gibson.

 

Ora ta trata di personanan cu tin hopi tempo caba ta ehercé un funcion di confianza den nos comunidadnan, e proceso di screening mester ta basá riba hechonan cu nan por verificá y confirmá.

No por pone hechonan concreto un banda manera años di servicio par excelencia na fabor di nos sistema monetario y bay tras di insinuacion y redo.

E Minister incorectamente a bay tras di e hecho cu tin un investigacion penal andando contra dr. Tromp pa un tempo demasiado largo caba.

 

Dr. Tromp ta refuta e sospechonan di Ministerio Publico categoricamente y e lo defendé su mes contra di e sospechonan aki den un Corte imparcial.

Mientrastanto lo e apelá e decision di Minister Presidente di Sint Maarten inmediatamente. Dr. Tromp pa promé biaha den su tempo a tuma un vakansi largo pa no stroba e investigacion, pero e investigacion aki ta tardando ‘ad seculae seculorum’, mientras cu e Procurador General cu a ordená e investigacion mes ta a punto di repatriá pa su pais natal.

 

Pa colmo e Presidente interino di Banco Central Jerry Hasselmeyer ta malo pa basta dia caba.

Basicamente abogado Bloem a terminá e declaracion na nomber di dr. Tromp cu e no ta mira e utilidad y necesidad pe Minister sali haci declaracion contra cual e sa cu por apelá y cu ta daña reputacion di dr. Emsley Tromp.

.

Top