Encuentro di Prome Minister Eman cu Genootschap Nederland-Aruba a bay den forma positivo

Un di e encuentronan cu Prome Minister Mike Eman tabatin den su biahe pa Hulanda tabata cu Genootschap Nederland-Aruba. Un organisacion cu ta traha na bienestar di Aruba.

Genootschap Nederland Aruba ta un organisacion cu a wordo lanta na 1997 cu e meta pa mehora e imagen y relacion di Hulandesnan cu Aruba. E organisacion na e momentonan aki ta wordo presidi pa Nico na Grieken, kende tabatin un encuentro cu Prome Minister Mike Eman na Den Haag. Prome Minister Mike Eman durante su biahe pa Hulanda a trata di tene mas tanto reunion posibel cu organisacionnan cu tin di haber cu Aruba y Arubianonan y GNA tabata un di e organisacionnan aki.

 

Di su encuentro cu e mandatario Nico van Grieken a bisa cu e encuentro tabata uno positivo y el a haya e impresion cu Prome Minister Eman tin un bon bista di loke ta tumando luga na Hulanda. Pero pa nan di GNA tabata hopi interesante pa scucha for di e mandatario mes riba kico su Gobierno ta trahando y di su vision. “Esaki sigur ta un bon momento pa Premier Eman ta na Hulanda pasobra tin e combersacionnan andando pa un Gobierno nobo”, segun van Grieken.

 

Pa loke ta e relacionnan di Reino, van Grieken ta bisa cu esaki tabatin su “ups & downs”, pero cu danki Dios cu awendia esaki ta bon, danki hustamente na e intervencion di Aruba. Esaki a trece un bon relacion, “aunke cu tin politiconan cu lo tin otro opinion, pero en general ta asina cu e Statuut di Reino ta wordo aprecia y kier sigui den e forma aki. Mi tin e speransa mirando e resultado di e eleccion cu e relacionnan di Reino lo keda stabiel.”

 

Posicion di Aruba, siendo e pais mas prospero den Caribe Hulandes, door di su ubicacion y clima di inversion atractivo ta brinda un bon oportunidad pa empresanan Hulandes manda nan productonan pa mercadonan di Centro y Latino America.

“E isla a expresa na diferente ocasion cu e kier traha den cuadro di Reino Hulandes. Ademas, Aruba ta un pais cu ta uni pa traha pa futuro y no ta perde tempo pa mira den pasado”, van Grieken a expresa su mes asina di forma positivo di Aruba.

 

GNA regularmente ta organisa encuentronan pa duna mas informacion posibel di Aruba.

Asina p. e. nan a yega di tene reunion unda cu tabatin como oradornan invita Vice Presidente di Raad van State sr. Donner, Minister Plasterk y Prome Minister Eman.

E encuentronan aki semper ta bon bishita.

Top