Endy Croes apunta un biaha mas den Comision Hall of Fame WBSC

Endy Croes a continua cu trabounan grandi riba plataforma internacional representando Aruba.

Diaranson tabatin e prome Board Meeting preparando p’e congreso final unda a trata masha hopi punto interesante pa cu desaroyo di softball.

 

Board a tuma diferente desicionnan cual lo mester wordo aproba finalmente pa congreso.

Entre otro lo pidi aprobacion final di congreso pa softball internacional cuminsa organisa campeonato mundial den categoria “Under 16 Girls”. Esaki a wordo aproba unanimamente. Asina lo cumpli cu e vision di Comite Olimpico Internacional pa hiba e desaroyo den nos hubentud.

 

Tambe, e prome reunion di comision Hall of Fame a tuma lugar, unda cu a logra induci 14 atleta y of dirigente di rond mundo rib’e lista di Hall of Fame.

Nan reconocimento oficial lo bini mas dilante.

E comision tabata consisti di Andree Overbeek (Hulanda), Mashito Matsetela (South Africa), Hiromi Tokuda (Japon), Tony Giles (New Zeeland), Tony Morales (Colombia) y Endy Croes (Aruba).

E comision aki mester revisa y repasa tur e logronan di cada nominado y finalmente controla si nan ta cumpli cu e criteria estableci den e reglamentonan oficial di WBSC Softball.

 

Finalmente e nombernan cu si a pasa e screening y cumpli cu criteria a wordo aproba pa dicho comision, y lo wordo presenta diasabra awor durante e congreso oficial pa ratificacion pa asina oficialmente nan por drenta Salon di Fama.

Trabounan a continua den comision di “equipment and regulations” unda Chipen Chirino ta atiendeno esaki y Endy Croes lo atende cambio nan di reglamento den comision di reglamento.

 

Contactonan a wordo realisa cu Presidentenan nobo di diferente pais unda Aruba ta ricibiendo hopi sosten pa intercambionan di weganan di fogeo pa mehora nos selecionnan nacional. Trabounan ta hopi pero Aruba ta al dia cu e ultimo desaroyonan y lo percura pa aplica nan mesora na Aruba.

 

Top