Endy Croes y Chipen Chirino a sali pa Botswana, Africa pa atende Congreso Mundial WBSC World Baseball and Softball Confederation

Dialuna ultimo a sali pa Botswana, Africa Presidente y Vice Presidente di Aruba Softball Bond, esta Endy Croes y Francisco “Chipen” Chirino.

For di 2015 tabata conoci cu  Botswana, Africa a gana e bidding pa host e Congreso Mundial di Baseball y Softball.

Pa bay bek poco den historia na 2014 na Tunesia a logra unifica e dos Federacionnan International, esta IBAF (Baseball) y ISF (Softball). Esaki mester a tuma lugar pa crea e oportunidad pa tanto Baseball y Softball regresa den weganan Olimpico.

 

Despues di e decision aki baseball (masculino) y softball (femenino) a logra drenta programa di weganan Olimpico pa cu Japon, Tokyo 2020.

WBSC awor ta consisti di dos disciplina esta Baseball y Softball. Dia 12 pa 15 di october proximo lo celebra e prome Congreso oficial di WBSC desde cu e fusion a tuma lugar bou di un solo dak, esta Baseball y Softball den union y hunto.

 

Endy Croes formando parti como miembro di directiva di WBSC a wordo apunta pa traha den diferente comision tanto Hall of Fame y tambe comision di reglamento. Tin un buki reglamento nobo cu lo bay sali na 2018 completamente revisa y modifica unda no lo papia mas di 12 reglamento, pero di Chapter 1 te cu 6.

Esaki e.o. ta riba programa pa wordo aproba. Tambe formatonan mas atractivo pa hunga campeonatonan internacional tanto clasificatorio como inovacion pa cu weganan mundial.

 

Chipen Chirino ta den comision di material cu mester wordo aproba pa por wordo usa y tambe lo bay ta trahando separadamente segun e Congeso ta avansa.

Aruba por ta orguyoso di tin su representantenan trahando den funcionan internacional. Sigur Endy y Chipen lo sa di busca cualkier beneficio internacional cu e contactonan riba e nivel aki cu por yuda nos isla progresa y desaroya nos deporte di softball.

 

 

Top