Entrada hudicial cu detencion y confiscacion di arma di candela

WILLEMSTAD – Dia 18 juni 2016 alrededor di 9’or di anochi tabatin un ladronicia cu violencia na un kantoor di number den e area di Otrobanda. Na e ocasion ey dos homber a drenta den e kantoor di number y a menasa tur hende presente y bay cu e benta di dia.

Durante di nan acto nan a los tiro den laira y bora e plafon. Riba mesun dia alrededor di 10’or, Polis a detene un di e sospechosonan, e homber J.A.P. di 26 aña di edad na altura di Seru di Domi den e auto cu nan a uza pa huy.

 

Continuando cu e investigacion den e caso aki, diasabra 25 di maart 2017 alrededor di 12’or di merdia, personal di e Team di Atraco hunto cu e Team di Aresto di Polis a tene un entrada hudicial den un cas den area di Kanga. E entrada hudicial tabata en conexion cu buskeda di e di dos sospechoso di e ladronicia cu violencia di dia 18 di juni 2016.

 

Durante di investigacion den e cas ariba menciona, Polis a detene e homber G.G.C. naci na Corsou di 29 aña di edad. Durante di e control den e cas a haya y confisca un pistol.

A presenta e sospechoso dilanti di un Fiscal Auxiliar cu a ordena su encarcelamento pa mas investigacion. E investigacion den e caso aki ta continua.

Top