ENTRADA lo ta GRATIS pa tur conciertonan di Aruba Symphony Festival, skirbi pa: Clyde Harms

Bon noticia pa amantenan di musica na Aruba!

Bon noticia #1: Nuevo Mundo Foundation a anuncia cu nan lo presenta Aruba Symphony Festival di 21 te cu 29 di juli.

Bon noticia #2: Atrobe lo tin un cantidad di maestronan di fama mundial cu lo participa.

Bon noticia #3: Cu excepcion di e ultimo nochi, tur concierto lo ta gratis.

E ultimo concierto ta di e Aruba Symphony Orchestra consistiendo di e maestronan y e miho studiantenan di e Academia Nuevo Mundo, bou direccion di e Colombiano Carlos Botero. E orkesta ta consisti di mas o menos 80 musico.

Algo impresionante cu nos na Aruba no tin hopi oportunidad pa mira y scucha. P’e concierto unico aki e entrada lo ta apenas 40 florin pa adulto. Pa muchanan bou 18 aña e entrada ta 20 florin. Carchinan di entrada ta na benta na Cas di Cultura.

Cumpra di bo tempran, pasobra e concierto aki lo yena sala grandi.

Breaking News. Mas bon noticia.

 

Ademas di Armand Simon, kende ta un “Guest Artist”, un otro Arubiano lo participa e aña aki atrobe. Jonathan Ortega, un Arubiano cu ta drenta Conservatorium di Tilburg na september, a wordo acepta como studiante y a haya un beca completo di Nuevo Mundo Foundation pa ricibi lesnan di e maestra Venezolano Edith Peña.

clydeharms@yahoo.com

Top