Estado di economia di Aruba no a mustra positivo den 2016

E actividadnan economico a disminui den e prome nuebe lunanan di 2016. Un caida den ambos ingreso turistico y consumo domestico a contribui na e desaroyo aki.

CAIDA INGRESO TURISTICO
Ingreso turistico, manera registra den e balansa di pago, a baha cu 0,4 porciento, contrario na un subida di 3,9 porciento den e mesun periodo di 2015. Esaki por ta relata na e cambio den e trend exuberante di e mercado Venezolano cu tabata evidente durante e ultimo cinco añanan.

RETRASO REHABILITACION REFINERIA
A pesar di e proyectonan vigente, manera e expansion di Dr. Horacio E. Oduber hospital y e ‘Green Corridor’, inversionnan no a realmente logra impulsa actividadnan economico manera anticipa debi na e retraso den e trabounan di rehabilitacion na e refineria.

CAIDA ENTRADA DI BBO
Indicadornan di consumo te cu e di tres trimester tambe a mustra un variedad di señalnan, pero en general consumo a sigui mengua. Notabel ta cu entradanan for di BBO a registra un caida durante e prome nuebe lunanan, y credito na consumidor a sigui baha.

TASA DI CAMBIO REAL A BAHA
Como resultado di un caida den e prijsnan di energia y e desaroyo den prijsnan modera di cuminda, e inflacion a baha durante e prome tres trimester di 2016. E tasa di cambio real di Aruba compara cu Merca a baha fuertemente cu 1,8 punto di porcentahe den e tercer trimester di 2016, compara cu e di cuater trimester di 2015, mehorando asina Aruba su posicion competitivo contra esun di Merca.

ENTRADA Y GASTONAN DI GOBIERNO A SUBI
Entrada di Gobierno a subi cu 2,8 porciento durante e prome nuebe lunanan di 2016, impulsa pa entrada mas halto di impuesto riba ganashi y tereno. E gastonan di Gobierno a subi cu 1,4 porciento, pa gran parti debi na pagonan mas halto di interes y e subsidio di Gobierno na AZV.
E debe di Gobierno na fin di september 2016 a crece te na Afl. 4.172,1 miyon, of 87,3 porciento di e PBD di Aruba.

EXPANSION PLACA DEN CIRCULACION
E cantidad di placa den circulacion a expande cu 6,3 porciento durante e prome nuebe lunanan di 2016. Un aumento den entrada di divisa (+Afl. 269,4 miyon) a mas cu compensa pa e Afl. 29,6 miyon caida den e activo domestico neto. E entrada den divisa, cual ta mas abou cu e periodo corespondiente na 2015, a origina principalmente for di ingreso di turismo y fiansanan di Gobierno for di exterior.

CRECEMENTO SIGNIFICATIVO DEN RESERVA OFICIAL
Tanto e cuenta coriente como e cuenta di capital y di finansa di balansa di pago a registra surplusnan, resultando den un crecemento significante den e reserva oficial.
Consecuentemente, e tasa di cobertura di importacion a yega 6,0 luna di e total di pagonan den cuenta coriente na fin di september 2016.

Pa resumi, e actividadnan economico domestico ta parse di a mengua den e prome nuebe lunanan di 2016. Actividadnan for di turismo, e motor principal di crecemento economico, a cay inesperadamente mientras cu e consumidornan local a keda cauteloso den nan gastonan.

Top