Esther Emerenciana-Gomes: Awo oficialmente, pero ya pa hopi aña AVP tin un tremendo candidato den Maurits Malmberg

Esther Emerenciana-Gomes ta un di e personanan cu diabierna anochi ultimo a introduci Maurits Malmberg como candidato nobo riba lista di Partido di Pueblo Arubano (AVP).

E hurista y consehero di Ministerio di Cultura conoce Malmberg como colega, pero amistad di cas ya pa algun aña.

Emerenciana-Gomes a papia di oranan largo cu ta traha hunto y bou di diferente circumstancia y con esaki a permiti’e siña conoce miho como persona y profesional; a base di esey e ta sigur cu e hoben ta un adkisicion balioso p’e partido y pa e progreso di Aruba.

 

“Mau ta real, e ta autentico. Si tur bisa si, pero su consenshi ta bisa no; e ta para tras di su no.

Mi tin cu bisa cu esey ta algo di admira y di respeta y ta un ehempel pa e generacion cu ta lanta.” Emerenciana-Gomes a declara di ta testigo di Malmberg su dedicacion y lealtad na e partido y pesey ta combenci cu ta un excelente candidato pa e eleccion dilanti porta.

“Den un temporada caminda autenticidad ta algo asina schars, e ta un joya; e ta un joya di aprecia y brasa”, el a bisa.

 

Ambos a traha hunto riba hopi proyecto den transcurso di ultimo añanan, recientemente den e evento historico cu tabata 1000voz.

“Tin biaha trahando te marduga, e anochi prome cu e evento, tabata combersacionnan hopi largo unda bo ta conoce otro mas miho; no solamente como colega, pero como amigo y eynan mi ta wak den Mau un homber cu ta stima su famia, cu ta stima su comunidad y cu ta stima e isla di Aruba”, Gomes-Emerencia a bisa na un publico den Cas di Partido Playa hopi anima.

 

Basa riba tur esaki, tabata un orguyo pa forma parti di su introduccion.

“Mi no tabatin palabra pa por a reacciona ora cu el a pidi mi pa introduci’e e anochi tan importante aki pa su persona, su casa, su yiu y su famia aki presente y tur esnan cu ta forma parti di Team Mau”, el a bisa.

Visiblemente afecta p’e emocion di e momento, Gomes-Emerencia a afirma cu Malmberg ta hopi merecedor di e oportunidad pa sirbi publico.

 

“Abo merece pa motibo di bo dedicacion, di bo lealtad y mi ta kere partido ta merece candidatonan manera nos Maurits y Aruba merece representantenan den Parlamento manera Mau. Biba Team Mau!”, e colega y amiga a finalisa bisando.

Pa conoce mas di e candidato nobo aki di AVP, bishita e ‘Like Page’ di Maurits Malmberg riba Facebook na: https://www.facebook.com/Maurits-Malmberg-1911769535732530/.

Leave a Reply

Top