Evelyn Wever-Croes: Aruba kier un Minister di Husticia cu ta trece orden y respet bek

Den conferencia di prensa di MEP, lider di MEP Evelyn Wever-Croes a reacciona brevemente riba e hecho insolito cu mientras e ta haci su trabou di controla y cuestiona Gobierno, un preso a sali ataca su persona haciendo su trabou.

“Esaki a pasa 10 dia pasa caminda un preso desde KIA atrabes di Telearuba a sali atacami y mi coleganan ora nos ta haci nos trabou.

Manera mi a bisa caba, ami no ta reacciona riba e preso. Pero e tema a haya un buelta interesante ora Minister di Husticia Dowers, enbes di bin Parlamento manera cu nos a yame, ta manda comunicadonan masha infantil den prensa, bisando cu ta MEP mes a provoca e preso”, segun lider di MEP.

 

Esaki no ta corecto tampoco, pasobra MEP a haci preguntanan por escrito na Gobierno cu NO a wordo contesta, y MEP a pidi e Minister bin duna cuenta den Parlamento, cual tampoco a sosode.

Pero p’e Minister sali e defende un criminal, ta mustra cu e Minister aki no ta para na banda di pueblo. Y ta pesey e bagamunderia y ilegalidadnan ta sosodiendo na Aruba.

E caso a haya otro buelta mas ora un otro cuidadano Danies siman pasa a basha abou riba e preso, pero no solamente e preso, sino den esey a envolcura henter e top di partido AVP.

 

Segun declaracion di Danies, Mike Eman, Arthur Dowers, Otmar Oduber y Benny Sevinger ta envolcura den negosacion pa entrega di un preso peligroso envolvi den asesinato; tambe a papia di pago di placa bou mesa.

En todo caso loke si a keda hopi cla t’e papel sumamente dudoso di e Minister di Husticia den sconde y tapa pa un criminal.

Tambe e papel sumamente dudoso di Mike Eman pa acepta esaki den su propio seno y den su cas di partido. Tambe e papel dudoso di Parlamentarionan di AVP.

 

“Ami no sa si tur locual sr. Danies a trece dilanti ta berdad, mi no tabata conoce tur e detayenan ey, y e storia a laga ami den shock, mescos cu mayoria otro hende, pero un cos si mi ta bisa: Si 10% di locual el a bisa SO ta berdad mes, anto aki na Aruba nos tin un problema hopi serio y partido AVP ta hinca den hopi bagamunderia y ilegalidad.

Pa nos e caso ta yega t’akinan. Awe mi tin un cita cu Procurador General y mi lo pone tur esaki den su man.

 

Pa manda un señal cla cu locual a pasa no ta normal. Ora e homber chikito por comete cualkier infraccion mesora ta baha riba dje cu tur peso di ley, pero awor cu e top di partido AVP ta envolcura den e bagamunderianan aki, no ta tuma accion?

Ta wordo hasta papia di asesinato! Si ni asina husticia no actua, nos pais berdad na man di gabinete Mike Eman ta den decadencia total.

Mientrastanto nos lo sigi exigi di e Minister cu e ta bin duna cuenta den Parlamento, y nos ta sigi cu nos trabou di conbence esnan cu nos falta di conbence pa sostene nos p’e cambio.

Pa hunto nos trece bek orden y respet.

 

Aruba no kier un Minister di Husticia cu ta fiesta cu criminalnan, ni cu tin miedo di criminalnan.

Aruba kier un Minister di Husticia cu ta actua cu man duro contra criminalidad y lo trece e biento fresco di seguridad riba nos pais”, lider di MEP Evelyn Wever-Croes a duna di conoce.

Leave a Reply

Top