Evelyn Wever-Croes campañando den Noord: Pueblo no por mas cu tanto criminalidad

Partido MEP e fin di siman aki a campaña hunto den e bario di Noord un biaha mas.

Nan ta referi na “entrada masal” den cual tur candidato y nan campañadornan ta drenta e bario.

Di e forma aki MEP ta mobilisa mas di 100 hende den e mesun bario.

 

“Ta un sistema cu nos ta campañando cu ne pa algun luna caba y e ta hopi efectivo.

E reaccion cu nos a haya den Noord ta tremendo. Hendenan ta habri porta di nan cas pa nos y ta hopi interesa pa scucha e vision di MEP. Nos ta enfoca riba e preocupacionnan di e bario mes, y e preocupacionnan di Aruba. Hopi hende ta preocupa pa e insiguridad na Aruba.

Nan ta anhela pa e Aruba di antes atrobe. Caminda tin orden y respet”, Wever-Croes ta splica.

 

“Un otro punto cu tin hopi hende den e bario malcontento ta e camindanan tur kibra y esunnan di santo. Nan no ta compronde con Gobierno ta hinca tanto miyones den un Green Corridor y a lubida e camindanan den bario. Nan ta disgusta cu e gobernantenan mes ta hinca miyones den nan saco cu e deal di Green Corridor, mientras cu e camindanan den nan bario ta den hopi mal condicion. Esaki ta daña e autonan y lanta hopi stof den e casnan.

Ta hopi aña nan ta pidiendo atencion pa e situacion ey sin haya oido. Y berdad, nos mes por a mira camindanan den e bario cu tabata den hopi mal condicion”, lider di MEP ta mustra.

 

“Nos compromiso ta pa cambia e prioridadnan di e Gobierno aki. No mas inversion den show, pero den combati criminalidad realmente. No mas caretera grandi di 400 pa 500 miyon, cu a enrikese hopi politico, sino drecha e careteranan den barionan prome.

E ser humano lo wordo poni central un biaha mas. Noord a expresa di ta cla p’e cambio.

Danki Noord pa e sosten masal”, lider di MEP, Evelyn Wever-Croes a duna di conoce.

Top