Evelyn Wever-Croes den Parlamento: Fraccion di AVP tabata sa di e corupcion rond di Minister di Trabou di AVP

Un biaha mas pueblo por a mira e nivel baho di Parlamento, na momento cu ta trata criminalidad, e Parlamentarionan di AVP a cuminsa ataca lider di MEP, sra. Evelyn Wever-Croes tocante famia atrobe.

 

“Mi a scucha hopi atake contra mi persona pa cosnan cu mi famia lo a haci. Lagami bisa esaki bon cla: Mi ta stima mi famia, pero ora un haci malo, e mester carga su consecuencianan.

Berdad e Minister di Trabou di AVP ta mi primo, y como persona ta duel mi locual e y su famia ta pasando aden. Pero ami a alert’e.

Ami tabata sa di e corupcion aki desde 2015, y mi a hala su atencion. Mi a conseh’e pa para e corupcion aki, y ademas mi a record’e cu e ta un CROES riba lista di AVP y nos tur sa cu un CROES riba lista di AVP ta wordo sacrifica. Kiermen ami a alert’e”, sra. Wever-Croes ta splica.

 

“Pero kico boso a haci? Pasobra boso tambe tabata sa di basta tempo. Boso mes a comenta esey aki den. Kico abo a haci ora bo a haya sa di e escandalo aki basta tempo pasa? Bo a sinta keto. Bo no a haci nada. Esey ta haci abo complice. Anto abo tin e curashi di bin cuestiona ami cu mi famianan?

Lagami pone esaki bon cla un biaha mas. Tur hende cu comete eror mester sinta riba su propio blaar, esey ta conta pa mi famianan tambe. Asina ami a lanta mi yiunan y asina ami ta trata TUR hende”, sra. Wever-Croes a remarca.

 

“Si e unico cos cu boso por haci aki den ta lastra famia di otro hende, ta demostra un biaha mas cu boso no tin argumento mas, y cu e Stempelparlement aki mester caba, y cu nos mester bin cu leynan pa caba cu e Stempelparlement aki.

Siguiente biaha cu bo kier ataca ami cu algo di mi famia, pensa prome kico ABO a haci ora bo a wordo poni na altura di e corupcion aki”, lider di MEP, ta locual sra. Evelyn Wever-Croes a contesta e Parlamentarionan di AVP.

Leave a Reply

Top