Evelyn Wever-Croes – E proyecto di hospital desde su inicio ta un proyecto yen di duda, y mester un investigacion

Parlamento e siman aki a trata e proyecto di hospital. Den su presentacion e lider di MEP, Evelyn Wever Croes a trece varios punto padilanti relaciona cu e proyecto aki.

“Durante e Parlamento anterior caba e dudanan aki a wordo expresa na varios ocasion, pero mayoria den e Parlamento bieu no kier a haci caso di e dudanan.

Awor nos tin un Parlamento nobo cu ta bisa loke e ta haci y ta haci loke e ta bisa, y kier mas transparencia.

E Parlamento nobo aki kier un investigacion riguroso di e proyecto pa atende cu tur duda. Si e investigacion prueba cu no tin motibo pa preocupa, nos lo t’e promenan pa admiti esey.

Si no t’asina, mester investiga y esnan responsabel, mester carga nan responsabilidad. Un Minister tin un responsabilidad personal tambe riba dje!” segun Evelyn Wever Croes

 

HISTORIA

Manera ta conosi na 2013 Gobierno a ‘bende’ Stichting Onroerend Goed Aruba (SOGA) e tereno di hospital pa SOGA renoba y expande e hospital. Condicion tabata cu Gobierno ta paga 24 miyon florin anual na huur na SOGA.

Gobierno di AVP a otorga e proyecto na un compania amigo di nan, cu a bid p’e prijs mas halto, y cu menos experiencia. Esaki a crea hopi duda.

 

E proyecto ta dudoso pa varios motibo, pa menciona algun: (1) A scoge esun cu a ofrece e prijs mas halto, 40 miyon mas halto, (2) A scoge esun cu a claim pa cobra ‘meerwerk’ enbes di esun cu a duna un prijs fiho y garantisa, (3) A scoge esun cu menos experiencia, y menos capacidad.

Cu esaki por a premira e problemanan cu awor nos ta pasando aden.

Pa por a paga e gastonan adicional di e proyecto Gobierno di AVP a bin cu e medidanan conoci como health tax: E health tax di 1% na december 2014 y 2% na juni 2015, y mirando e problemanan financiero serio cu Gabinete Mike Eman a laga Aruba aden, cu un deficit den presupuesto di 195 miyon, CAFT ta conseha pa hisa e health tax aki mas ainda.

Y tur esaki ta sin tene cuenta cu e gastonan extra di 83 miyon, y cu ta sigi aumenta.

 

Despues di un tempo, a crea mas duda na momento cu a anuncia cu e proyecto costoso aki no ta duna ni un kamber extra. Mas duda a wordo crea ora a resulta cu algun parti esencial no tabata inclui den e proyecto: Sala di operacion, intensive care units, y esaki ta haci e gastonan extra total 83 miyon florin, sin interes.

SOGA kier cubri e gastonan aki, pero kier pa Gobierno aumenta e huur cu 5 miyon florin pa aña, dus e huur ta bay bira 29 miyon florin cu Gobierno mester paga tur aña na SOGA p’e hospital aki.

 

Huridicamente e conseheronan a bisa cu si bo lesa e contrato literalmente, e Minister por hisa e prijs di huur sin pidi aprobacion di Parlamento prome, y e Minister a haci esey tambe.

E Minister a manda informa Parlamento si, y e Parlamento anterior a acepta e procedura aki. Sinembargo e Parlamento nobo tin un otro posicion, y no ta di acuerdo cu e forma con e Parlamento anterior a atende cu e tema importante y costoso aki.

Principalmente p’e falta di transparencia. Importante den e caso aki ta cu di e forma aki Gobierno ta aumenta e gasto total di e proyecto cu mas di 30%, sin mester di aprobacion di Parlamento. Esaki ta algo cu e Parlamento nobo no por acepta sin mas, y p’e motibo aki a yama Minister Schwengle pa duna cuenta y ta exigi un investigacion prome”, segun Evelyn Wever-Croes.

Leave a Reply

Top